លោកង៉ែត ជូបង្ហើបវិធីសាស្រ្ត៤យ៉ាងក្នុងការវិនិយោគលើវិស័យអចលនទ្រព្យ

កាលពីថ្ងៃទី២៦​ ខែកុម្ភៈ ឆ្នាំ២០២០នេះ លោកង៉ែតជូ​ដែលជាអ្នកជំនាញក្នុងវិស័យអចលនទ្រព្យ បានធ្វើការបង្ហោះលើហ្វេសប៊ុករបស់លោកឱ្យដឹងថា “វិធីសាស្រ្ត៤យ៉ាងក្នុងការវិនិយោគលើវិស័យអចលនទ្រព្យ” ដែលអ្នកអាចរៀនពីវិធីសាស្រ្តវិនិយោគលើផ្សារហ៊ុនរបស់លោក Warren Buffett ។

វិធីសាស្រ្តទាំង ៤នោះរួមមាន៖

១) ជ្រើសរើសការវិនិយោគលើក្រុមហ៊ុនដែលមានភាពទាក់ទាញ៖

ជាទូទៅលោក Warren Buffett វិនិយោគតែលើក្រុមហ៊ុនដែលមានតម្លៃស្នូល (Intrinsic value) អាចបង្កើតកំរិតផលចំណេញបានជាទីគាប់ចិត្ត។ លោកមិនផ្តោតការវិនិយោគភាគហ៊ុនរបស់ក្រុមហ៊ុន ហើយដេកចាំលក់ចេញនៅពេលតម្លៃហ៊ុនឡើងថ្លៃនោះទេ។ ដូចគ្នានេះដែរ អ្នកគួរវិនិយោគលើប្រភេទអចលនទ្រព្យដែលមានតម្លៃផ្នែកសេដ្ឋកិច្ច ពោលគឺអាចរកចំណូលបានដូចជាការជួលដី ឃ្លាំង។ល។ ធ្វើដូច្នេះ អ្នកមិនមែនទិញអចនទ្រព្យទុកកប់លុយចោលហើយរង់ចាំពេលលក់យកចំណេញនោះទេ។

២) ចាត់ទុកការវិនិយោគលើផ្សារហ៊ុនជាមុខរបរ៖

លោកចាត់ទុកការវិនិយោគជាមុខរបរ មិនមែនគ្រាន់តែទិញលក់យកចំណេញតែមួយគ្រាៗនោះទេ។ ធ្វើដូច្នេះទើបលោកអាចគ្រប់គ្រងចាត់ចែងផលបត្រ័ (Portfolio) វិនិយោគបានល្អព្រោះលោកនៅជាប់ជាមួយនឹងទីផ្សារ ហើយក្តាប់ព័ត៌មានបានច្បាស់ល្អ។ ការណ៍នេះវាផ្ទុយទាំងស្រុងពីអ្នកវិនិយោគលើផ្សារហ៊ុនទូទៅដោយគ្រាន់តែទិញ-លក់យកចំណេញក្នុងរយៈពេលខ្លីហើយក្តាប់ព័ត៌មានមិនបានល្អដែលជាបច្ច័យនាំអោយមានការសំរេចចិត្តខុស។ ដូចគ្នានេះដែរ អ្នកវិនិយោគលើវិស័យអចលនទ្រព្យគួរចាត់ទុកថាការវិនិយោគរបស់ខ្លួនជាមុខរបរហើយកសាងសមត្ថភាពអោយខ្លាំងជាសជាងការវិនិយោគតាមបែបទឹកជោរទឹកនាចដូចមនុស្សទូទៅ។

៣) វិនិយោគលើអ្វីដែលអ្នកស្គាល់ច្បាស់៖

លោកមិនវិនិយោគលើវិស័យណាដែលលោកមិនយល់ច្បាស់នោះទេព្រោះចៀសវាងកំហុសឆ្គងនៅក្នុងការសំរេចចិត្ត។ ដូចគ្នានេះដែរ ប្រសិនបើអ្នកចង់អោយការវិនិយោគលើអចលនទ្រព្យទទួលបានភាពជោគជ័យខ្ពស់ អ្នកគួរផ្តោតតែទៅលើប្រភេទអចលនទ្រព្យដែលអ្នកយល់ដឹងច្បាស់។ ឧទាហរណ៍ ដូចជាការផ្តោតលើការវិនិយោគលើដីជាយក្រុងនៅតំបន់ភ្នំប្រសិទ្ធិ ឬតំបន់អរិយ្យក្សត្រ។ល។ អ្នកនឹងមិនអាចជោគជ័យខ្លាំងនោះទេ ប្រសិនបើអ្នកធ្វើខុនដូលក់ផង និងវិនិយោគលើដីធ្លីនៅជាយក្រុងផងនោះ។

៤) មានវិន័យ និងវិនិយោគសំរាប់រយៈពេលវែង៖

លោកមិនស្លន់ស្លោរ រួចលក់ហ៊ុនចេញនៅពេលដែលស្ថានភាពសេដ្ឋកិច្ចមិនសូវអំណោយផលនោះទេ។ ជាទូទៅលោកវិនិយោគរយៈពេលវែង បើស្ថានភាពសេដ្ឋកិច្ចមិនសូវល្អហើយតម្លៃហ៊ុនធ្លាក់ចុះ លោកផ្តោតលើការទិញហ៊ុនបន្ថែមក្នុងតម្លៃទាប។ ការប្រព្រឹត្តរបស់លោកផ្ទុយពីឥរិយាបទនៃអ្នកវិនិយោគទូទៅ។ ដោយឡែកការវិនិយោគលើអចលទ្រព្យក៏គួរយកគំរូតាមលោកWarren Buffett ត្រង់ចំនុចវិន័យ និងចក្ខុវិស័យរយៈពេលវែងនេះដែរ។ អញ្ចឹងហើយយុទ្ធសាស្រ្តធនាគារដីធ្លី Land Banking ជាយុទ្ធសាស្រ្តសមស្របបំផុត ជាពិសេសសំរាប់អនុវត្តនៅប្រទេសដែលសេដ្ឋកិច្ចមានការរីកលូតលាស់លឿនដូចប្រទេសកម្ពុជា។