ការជ្រើសរើសទីតាំងសម្រាប់រស់នៅគឺសំខាន់ណាស់ បើយើងទិញផ្ទះចំទីតាំងល្អការរស់នៅនឹងទទួលបានទាំងសេចក្ដីសុខ និងផលចំណេញ ប៉ុន្ដែប្រសិនបើទិញចំទីតាំងដែលមិនល្អនោះការរស់នៅគឺមិនស្រួលឡើយ ហើយផលចំណេញពីផ្ទះក៏បានតិចដែរ។ ដូច្នេះហើយមុននឹងសម្រេចចិត្ដទិញផ្ទះ តម្រូវឲ្យយើងត្រូវគិតគូរឲ្យបានច្បាស់ចំពោះទីតាំង ស្របពេលបច្ចុប្បន្នការអភិវឌ្ឍលំនៅដ្ឋានគឺមានច្រើន ពិសេសនៅរាជធានីភ្នំពេញតែម្ដង។

យ៉ាងណាទាក់ទងនឹងបញ្ហានេះដែរ នាពេលថ្មីៗកន្លងទៅនេះ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអ្នកជំនាញផ្នែកអចលនទ្រព្យមួយរូបនៅកម្ពុជា បានបង្ហាញតំបន់ ២ ដែលជាទីតាំងមានសក្ដានុពល និងមានប្រជាប្រិយភាពខ្លាំងសម្រាប់ការរស់នៅបច្ចុប្បន្ន។ ដោយតំបន់ទាំងនោះរួមមាន៖ តំបន់ផ្លូវជាតិលេខ ៦A ស្ថិតនៅក្នុងខណ្ឌជ្រោយចង្វារ និងតំបន់ផ្លូវជាតិលេខ១ ស្ថិតនៅក្នុងខណ្ឌច្បារអំពៅ។

ថ្លែងប្រាប់ Business Cambodia លោកបានមានប្រសាសន៍ថា «តំបន់ដែលកំពុងមានប្រជាប្រិយភាពមានផ្លូវជាតិលេខ៦A នៅក្នុងខណ្ឌជ្រោយចង្វារ ហើយនិងផ្លូវជាតិលេខ១ ដែលមានបុរី ប៉េង ហួត និងបុរីផ្សេងៗទៀតហូរហែ»។

ចំពោះមូលហេតុដែលលោកលើកឡើងថា តំបន់ទាំងពីរខាងលើនេះជាទីតាំងល្អសម្រាប់ការរស់នៅ ដោយសារភូមិសាស្រ្ដនៅទីនោះគឺជាប់ទន្លេ ដីមានសំណើម ងាយស្រួលនៅក្នុងការដាំដើមឈើ ជាហេតុធ្វើឲ្យការរស់នៅមានភាពត្រជាក់ស្រួល។ មួយទៀតវាក៏មានអុកស៊ីសែនច្រើន ដែលងាយស្រួលនៅក្នុងការដកដង្ហើម និងធ្វើឲ្យខ្យល់អាកាសមានភាពស្រស់ស្រាយផងដែរ។ មួយវិញទៀតតាមការប្រមើលមើលរបស់លោក ៥ ទៅ ១០ ឆ្នាំខាងមុខ តំបន់ទាំងនេះនឹងមានការអភិវឌ្ឍកាន់តែខ្លាំងថែមទៀត។

ចំពោះមូលហេតុដែលលោកលើកឡើងថា តំបន់ទាំងពីរខាងលើនេះជាទីតាំងល្អសម្រាប់ការរស់នៅ ដោយសារភូមិសាស្រ្ដនៅទីនោះគឺជាប់ទន្លេ ដីមានសំណើម ងាយស្រួលនៅក្នុងការដាំដើមឈើ ជាហេតុធ្វើឲ្យការរស់នៅមានភាពត្រជាក់ស្រួល។ មួយទៀតវាក៏មានអុកស៊ីសែនច្រើន ដែលងាយស្រួលនៅក្នុងការដកដង្ហើម និងធ្វើឲ្យខ្យល់អាកាសមានភាពស្រស់ស្រាយផងដែរ។ មួយវិញទៀតតាមការប្រមើលមើលរបស់លោក ៥ ទៅ ១០ ឆ្នាំខាងមុខ តំបន់ទាំងនេះនឹងមានការអភិវឌ្ឍកាន់តែខ្លាំងថែមទៀត។

សូមជម្រាបថា បច្ចុប្បន្នតំបន់ផ្លូវជាតិលេខ១ និងលេខ៦A កំពុងទាក់ទាញក្រុមហ៊ុនអភិវឌ្ឍន៍ជាច្រើនទៅសាងសង់លំនៅឋាននៅទីនោះ ជាក់ស្ដែងសព្វថ្ងៃនៅបណ្ដោយផ្លូវជាតិលេខ ៦A មានគម្រោងបុរីជាច្រើនដូចជា មេគង្គលែន, បុរី ជីប ម៉ុង, បុរី​ អ័​រ​គី​ដេ បុរី​ ប៉េង​ហួត បុរី The Flora និងបុរី អាម៉ូរី ជាដើម។ ហើយថ្មីៗនេះ ផ្សារទំនើប ម៉ាក្រូ ដែលជាផ្សារលក់ទំនិញដ៏ធំមួយក៏ទើបនឹងបើកដំណើរការនៅតំបន់នេះផងដែរ។

ដោយឡែកនៅបណ្ដោយផ្លូវជាតិលេខ១ វិញបច្ចុប្បន្នក៏មានការការអភិវឌ្ឍខ្លាំងខ្លាដូចគ្នា ដោយក្នុងនោះមានបុរីធំៗដូចជា បុរី ប៉េង ហួត បឹងស្នោ, បុរី ហាយ ធីច, និងបុរីជាច្រើនផ្សេងទៀត។ មួយវិញទៀតនៅតំបន់នេះក៏ជាច្រកចេញចូលដ៏សំខាន់ដែលមានមនុស្សរាប់ម៉ឺននាក់ឆ្លង់កាត់ក្នុងមួយថ្ងៃៗ។ ហើយថ្មីៗនេះ រាជរដ្ឋាភិបាលក៏ទើបនឹងបានបើកសម្ពោធការរដ្ឋានសាងសង់ស្ពានធំមួយទៀតតភ្ជាប់ពីផ្លូវជាតិលេខ១ឆ្ពោះទៅតំបន់ល្វាឯម និងគម្រោងផ្លូវល្បឿនភ្នំពេញ-បាវិតផងដែរ៕

ប្រភពពី៖ Business Cambodia

ភ្នំពេញៈ ប៉ែកខាងជើងនៃរាជធានីភ្នំពេញ នៅប៉ុន្មានឆ្នាំចុងក្រោយនេះ ឃើញថាមានការអភិវឌ្ឍលើហេដ្ឋារចនាសម្ព័ន្ធជាច្រើនហើយក្នុងឆ្នាំ២០២៣នេះដែរ។

សមិទ្ធផលមួយចំនួននៅប៉ែងខាងជើងរាជធានីភ្នំពេញ ក៏ចាប់ផ្ដើមលេចរូបរាង ដោយខ្លះក៏បានដាក់ឱ្យប្រើប្រាស់ ។ សមិទ្ធផលថ្មីៗនេះរួមមានការដាក់ដំណើរការស្ពានអាកាសឬស្សីកែវ ការដាក់ដំណើរ​ការស្ពានយោងដោយខ្សែកាបលើកដំបូង ឆ្លងកាត់ទន្លេសាបតភ្ជាប់ពីផ្លូវជាតិលេខ៥ ទៅកាន់តំបន់ជ្រផយចង្វារ ពហុកីឡដ្ឋានមរតកតេជោ ជាដើម។

គំរោងហេដ្ឋារចនាសម្ព័ន្ឋធំៗទាំងនេះ នឹងជំរុញឱ្យបណ្ដាខណ្ឌនៅខាងជើងភ្នំពេញ ជាពិសេសខណ្ឌចំនួនពីរគឺខណ្ឌឬស្សីកែវ និងខណ្ឌជ្រោយចង្វារ កាន់តែមានទំនាក់វិនិយោគខ្លាំងឡើង។

សមិទ្ធផលចំនួនពីរដែលរាជរដ្ឋាភិបាល បានប្រកាសដាក់ឱ្យប្រើប្រាស់នៅមុនចូលឆ្នាំខ្មែរកន្លងមកនេះ នឹងក្លាយជាឈ្នាប់ក្នុងការភ្ជាប់ទំនាក់ទំនងវិនិយោគដីធ្លី និងអចលនទ្រព្យនៅខណ្ឌជ្រោយចង្វារ និងខណ្ឌឬស្សីកែវបន្ថែមទៀត ហើយវាក៏នឹងជំរុញឱ្យតម្លៃដីធ្លីបន្ថែមទៀតនៅក្នុងខណ្ឌទាំងនេះផងដែរ។

អ្នកជំនាញ នៃវិស័យអចលនទ្រព្យជាច្រើន បានមើលឃើញថាតំបន់ប៉ែកខាងជើងរាជធានីភ្នំពេញ កាន់តែមានសក្ដានុពលនិងមានការចាប់អារម្មណ៍ពីសំណាក់វិនិយោគិនទាំងក្នុង និងក្រៅប្រទេស។

លោកស្រីតាំង  ហួរ អគ្គនាយិកាក្រុមហ៊ុន Amatak Property service បានលើកឡើងថា តំបន់ជ្រោយចង្វារ នឹងនឹងក្លាយជាទីក្រុងពាណិជ្ជកម្មថ្មីមួយ នៅរាជធានីភ្នំពេញ ហើយតំបន់នេះក៏នឹងពោរពេញទៅដោយការអភិវឌ្ឍផ្ទះទំនើបៗ និងផ្ទះអាជីវកម្មជាច្រើន ។

លោកស្រីបន្តថា “ដីធ្លីនៅតំបន់នេះ ក៏នឹងមានកំណើនឡើងជាបន្តបន្ទាប់ដែរ ស្របនឹងការអភិវឌ្ឍហេដ្ឋារចនាសម្ព័ន្ធ ពីភ្នំពេញទៅតំបន់នោះ និងការអភិវឌ្ឍហេដ្ឋារចនាសម្ព័ន្ធ ក្នុងតំបន់នោះក៏កំពុងតែមមាញឹក”។

ចំណែកលោកថាន់ ចាន់ណា អគ្គនាយកក្រុមហ៊ុន Channa Land បានឱ្យដឹងផងដែរថា តំបន់ជ្រោយចង្វារ ចាប់ពីគល់ស្ពានជ្រោយចង្វារទៅផ្លូវជាតិលេខ៦ ដីធ្លីកាន់តែឡើងថ្លៃហើយពិបាកក្នុងការទិញដើម្បីអភិវឌ្ឍន៍ណាស់។ អ្នកអភិវឌ្ឍន៍នៅតំបន់នោះ គឺទិញដីហើយត្រូវអភិវឌ្ឍន៍អចលនទ្រព្យ ដូចជាផ្ទះ និងខុនដូ ដែលមានតម្លៃខ្ពស់ ។

លោកបន្តថា “ជាការកត់សម្គាល់ ក៏បានឃើញថាតាមបណ្ដោយផ្លូវជាតិលេខ៦ គឺសំបូរទៅដោយលំនៅឋានតម្លៃខ្ពស់ៗ”។

មែនទែនទៅតំបន់ជុំវិញរាជធានីភ្នំពេញ សុទ្ធតែមានសក្ដានុពលក្នុងការអភិវឌ្ឍមិន គ្រាន់តែសក្ដានុពលនៅតំបន់ទាំងនោះ គឺអាស្រ័យទៅលើប្រភេទអចលនទ្រព្យ។ ការសាងសង់ផ្លូវក្រវ់ាត់ក្រុង ក៏ជាចំណែ​កមួយ ក្នុងការជំរុញការអភិវឌ្ឍតំបន់ជុំវិញ រាជធានីភ្នំពេញ កាន់​តែ​ផុសផុលឡើងបន្ថែមទៀត៕

ប្រភពពី៖ Property Area

នៅពេលដែលសម្រេចចិត្តទិញផ្ទះក្នុងគម្រោងបុរី អ្វីដែលពិបាកស្មានគឺបញ្ហានៅថ្ងៃមុខ អ៊ីចឹងបានជាមនុស្សភាគច្រើនគិតថាយកលុយទៅសង់ផ្ទះខ្លួនឯងទើបល្អជាង។ តែយ៉ាងណាការទិញផ្ទះក្នុងបុរីបើទិញត្រូវគឺចំណេញ បើទិញខុសវិញប្រាកដជាទឹកភ្នែកជាមិនខាន។ ដូច្នេះហើយរាល់ការទិញគឺទាមទារការពិនិត្យឱ្យល្អិតល្អន់ មិនថាទំហំ ទីធ្លាមុខផ្ទះ ឬក៏គុណភាពសំណង់នោះទេ។

យ៉ាងណាទាក់ទងនិងការទិញផ្ទះក្នុងគម្រោងនេះផងដែរ លោក លឹម រ៉ាវុធ នាយកផ្នែកលក់និងទីផ្សារ នៃក្រុមហ៊ុន Pointer Property បានលើឡើងចំនួន២ ចំណុចធំៗ ដែលលោកអ្នកគួរសិក្សាមុនទិញផ្ទះនៅក្នុងគម្រោងបុរី ចៀសវាងទឹកភ្នែកពេលទិញហើយ ។​

 ១. លើអ្នកអភិវឌ្ឍគម្រោង

• ប្រវត្តិ នឹង សមិទ្ធិផល របស់អភិវឌ្ឍគម្រោង

​ត្រូវ​គិត​ជា​មុន​ថា តើ​អ្នក​ណា​ជា​អ្នក​អភិវឌ្ឍ​គម្រោង​លំនៅ​ឋាន​នោះ ដែល​សំដៅលើ​បុរី តើ​ម្ចាស់​បុរី​ជា​អ្នក​ណា មកពីណា និង​មាន​ប្រវត្តិ​យ៉ាងម៉េច ។ ដូចដែល​បានដឹង​ហើយ​ថា បុរី​មាន​ច្រើន ហើយ​បុរី​ទាំង​អស់នោះ ក៏​មិន​ប្រាកដ​ថា​ម្ចាស់​បុរី​ទាំងអស់​សុទ្ធ​ជា​អ្នកមាន​ទ្រព្យ​ផ្ទាល់ខ្លួន​មក​វិនិយោគ​នោះ​ទេ ជួនកាល ម្ចាស់​បុរី​អាច​យក​ឥណទាន​ពី​ធនាគារ​ដើម្បី​មក​អភិវឌ្ឍន៍​ក៏ថាបាន។

• ប្លង់មេរួមទាំងមូលរបស់គម្រោងអភិវឌ្ឍ

ផែនការមេរបស់គម្រោងបុរី គឺជាប្លង់មេ ដ៏សំខាន់របស់គម្រោង។ វាបង្ហាញពីប្លង់រួម នៃគម្រោងមានដូចជា ហេដ្ឋារចនាសម្ព័ន្ធ និង លំនៅឋានគ្រប់ប្រភេទទាំងអស់ដែលមាននៅ ក្នុងគម្រោងនេះ ហើយប្លង់មេ ទាំងអស់ស្របតាមការអភិវឌ្ឈន៍របស់ក្រុង និងប្លង់មេអាចធ្វើឱ្យបុរីនោះអាចដំណើរការប្រកបដោយស្ដង់ដារ។

• គុណតម្លៃរបស់គម្រោងបន្ទាប់ពីបញ្ចប់ការសាងសង់

​ត្រូវ​មើល​ទីតាំង​របស់​បុរី​ដែល​ចង់​ទិញ​ផង​ថា តើ​បុរី​នោះ​មាន​ប្រវត្តិ​លិច​ទឹក​ដែរ​ទេ ស្ថិត​នៅ​តំបន់​មាន​សន្តិសុខ​ដែរ​ទេ អាច​ប្រកប​អាជីវកម្ម ឬ​ក៏​នៅ​ជិត​តំបន់​អាច​ប្រកប​អាជីវកម្ម​ដែរ​ឬទេ ដូច​ជា នៅ​ជិត​ផ្សារ សាលារៀន រោងចក្រ​សហគ្រាស និង​មន្ទីរពេទ្យ​ជាដើម ។

• សេវាកម្មគ្រប់គ្រងបន្ទាប់ពីគម្រោងបានបញ្ចប់

បច្ចុប្បន្ន និងអនាគតខាងមុខ មនុស្ស​កាន់តែច្រើនឡើងនឹងជ្រើសរើស​ការទិញផ្ទះ និងរស់នៅ នៅក្នុងបុរី ព្រោះវាជា​ការរស់នៅបែបថ្មី ដែលមានផាសុខភាព និងសុវត្ថិភាព។ ដូច្នេះហើយ នៅពេលអ្នកទិញផ្ទះពីគម្រោងណាមួយ អ្នកក៏ត្រូវផ្តោតលើសេវាថែទាំ និងសេវាកម្មសន្តិសុខ​បុរីផងដែរ។ ហេតុអ្វី? ព្រោះថា ប្រសិនមិនមានការគ្រប់គ្រងល្អទេ មិនមានសុខសុវត្ថិភាពទេ ការរស់នៅនឹងមិនមានការកក់ក្តៅ និងផាសុខភាព ដែលជះឥទ្ធិពលខ្លាំង​ទៅលើកេរ្តិ៍ឈ្មោះតំបន់ដែលអ្នករស់នៅ និងទាញតម្លៃអចលនវត្ថុនៅទីនោះ​មិនឱ្យងើបបាន។ ចូរអ្នកស្រមៃមើល ប្រសិនបើទីធ្លាបុរីមិនស្អាត មិនមានរបៀប រញ៉េរញ៉ៃ ចូលទៅងងឹតស្លុង​ ហើយមិនមានសុវត្ថិភាព អ្នកនឹងចង់ទិញ ឬចូលរស់នៅក្នុងផ្ទះនៅតំបន់នោះដែរឬទេ?

២.កត្តាតំបន់

• ត្រូវដឹងពីផែនការអភិវឌ្ឍយុទ្ធសាស្រ្តក្នុងតំបន់នោះ

មុននឹងទិញផ្ទះ អ្នកគួរតែសិក្សាស្វែងយល់ពីតំបន់នោះ ស្វែងរកព័ត៌មាននានាលើសារព័ត៌មាន ចូលសួរព័ត៌មានលម្អិតពីតំបន់នោះពីអ្នកលក់ ដើម្បីដឹងពីសន្ទុះវិវឌ្ឍក្នុងតំបន់នោះ។ ប្រសិនបើអ្នកចង់ចំណេញក្នុងការវិនិយោគទិញផ្ទះ អ្នកគួរតែតាមដាន​ផែនការអភិវឌ្ឍន៍របស់​រាជរដ្ឋាភិបាល ផែនការអភិវឌ្ឍន៍ក្រុង ឬក៏តាមដានមើលពីសន្ទុះនៃការវិនិយោគរបស់ក្រុមហ៊ុនឯកជននានាទៅលើតំបន់នោះ។

ប្រសិនបើអ្នកចង់ទិញផ្ទះចំណេញ អ្នកគួរតែដាក់កាលវិភាគ​ក្នុងការ​ជិះមើលតំបន់នានាជាប្រចាំ ដើម្បីមើលពីសន្ទុះទិសដៅនៃការអភិវឌ្ឍ និងការប្រែប្រួលនានា៕

ប្រភពពី៖ Business Cambodia

ការសម្រេចចិត្តទិញផ្ទះត្រូវបានចាត់ទុកថាជាការសម្រេចចិត្តមួយដ៏ធំធេងសម្រាប់មនុស្សម្នាក់ៗ។ ដូច្នេះយើងត្រូវការគិតគូរឱ្យបានល្អិតល្អន់ជាមុនសិនមុននឹងធ្វើការសម្រេចចិត្តដ៏សំខាន់មួយនេះ។ ជាពិសេស អ្នកដែលមិនធ្លាប់មានបទពិសោធន៍ទិញផ្ទះកន្លងមក ពោលគឺបទពិសោធន៍ថ្មីថ្មោងនេះតែម្ដង។​

យ៉ាងណាទាក់ទងនិងការទិញផ្ទះផងដែរក្នុងនោះអ្នកជំនាញផ្នែកអចលនទ្រព្យមួយរូបបានប្រាប់ពីរឿងរ៉ាវខ្លះៗដែលលោកអ្នកគួរគិតពិចារណា មុនសម្រេចចិត្តទិញផ្ទះមិនថាផ្ទះនោះជាផ្ទះដែលកំពុងសាងសង់ឬជាផ្ទះដែលសង់ឱស្រាច់ក៏ដោយ។

ថ្លៃងប្រាប់ Business Cambodia លោកលោក​ លឹម រ៉ាវុធ ដែលជានាយកផ្នែកលក់និងទីផ្សារ នៃក្រុមហ៊ុន Pointer Property បានលើយ៉ាងដូច្នេះថា “​ មិនថាទិញផ្ទះក្នុងអំឡុងពេលសាងសង់ឬទិញផ្ទះដែលសង់ហើយសុទ្ធតែមានគុណសម្បត្តិនិងគុណវិបត្តិរបស់វារៀងៗខ្លួន”។​ ក្នុងនោះលោកក៏បានបន្តថា ចំពោះអ្នកចង់ទិញផ្ទះអំឡុងពេលគម្រោងកំពុងសាងសង់គួរមើលចំណុចទាំងនេះ៖

 ១. តម្លៃធានានឹងកើនឡើង

ភាគរយច្រើនគឺអ្នកទិញទទួលបានផ្ទះក្នុងតម្លៃសមរម្យអាចទទួលយកបាន ព្រមទាំងទទួលបានផលចំណេញទៅថ្ងៃមុខបន្ទាប់ពីផ្ទះបានសាងសង់រួច ពីចន្លោះ១០%-៣០% ទៅតាមស្ថានភាពទីផ្សារអចលនទ្រព្យជាក់ស្តែង។

២. លក្ខខណ្ឌបង់ប្រាក់អំណោយផល

អ្នកពុំចាំបាច់មានលុយទាំងដុំដើម្បីទៅទិញនោះទេ ដោយសារមានជម្រើសក្នុងការបង់ប្រាក់ងាយស្រួល ដោយអ្នកអាចធ្វើការបង់រំលស់ត្រឹម ១០% ២០% ឬច្រើនជាងនេះទៅតាមគម្រោងនីមួយៗ។ កាន់តែពិសេសទៀតនោះ គម្រោងខ្លះអនុញ្ញាតឱ្យអ្នកធ្វើការបង់រំលស់សុទ្ធ១០០%តែម្តង ពោលគឺរំលស់រយៈពេលវែងប្រចាំខែ។

៣. មិនបាច់ចំណាយលើថ្លៃកែលម្អឡើងវិញ

ផ្ទុយពីការទិញផ្ទះបន្តពីម្ចាស់មួយទៀត គុណសម្បត្តិដ៏ចម្បងមួយនៃការទិញមុនពេលគម្រោងកំពុងសាងសង់គឺអ្នកមិនចាំបាច់ចំណាយថវិកាបន្ថែមទៅលើការលាបថ្នាំថ្មី ជួសជុលកែលម្អ ឬផ្លាស់ប្តូរសម្ភារចាស់គំរឹលមួយចំនួនឡើយ ពោលគឺគ្រាន់តែត្រៀមខ្លួនរើអីវ៉ាន់ចូលទៅនៅជាការស្រេច។

៤. ទទួលបានការផ្តល់ជូនពិសេស និងការបញ្ចុះតម្លៃផ្សេងៗ

គុណសម្បត្តិមួយទៀតនៃការទិញមុនគម្រោង គឺការទទួលបាននូវតម្លៃប្រូម៉ូសិនពិសេស ក៏ដូចជាការថែមជូនផ្សេងៗទៅតាមគម្រោងនីមួយៗ ដោយអ្នកអភិវឌ្ឍន៍គម្រោងព្យាយាមធ្វើយ៉ាងណាឱ្យគម្រោងរបស់ខ្លួនមានទីផ្សារប្រកួតប្រជែងជាមួយគម្រោងផ្សេងៗទៀត។ ដូច្នេះវាជាឱកាសស្វែងរកផលចំណេញដ៏ល្អមួយ សម្រាប់អ្នកទិញទុកដើម្បីស្នាក់នៅ ឬវិនិយោគ។

ដោយឡែកចំពោះអ្នកដែលចង់ទិញផ្ទះដែលដាក់លក់ឡើងវិញ ឬ សាងសង់រួច គួរពិនិត្យមើលចំណុចនេះសិន៖

១. អ្នកអាចរើឥវ៉ាន់ចូលទៅនៅភ្លាមៗបន្ទាប់ពីផ្ទេរប្លង់កម្មសិទ្ធិរួច

ផ្ទុយពីការទិញផ្ទះមុនគម្រោងកំពុងសាងសង់ គុណសម្បត្តិនៃការទិញផ្ទះបន្តគឺអ្នកអាចចូលទៅនៅភ្លាមៗ ដោយមិនចាំបាច់រង់ចាំដល់ទៅ២-៣ឆ្នាំរហូតសំណង់គេហដ្ឋានត្រូវបានបញ្ចប់។

២. មានហានិភ័យតិច

ចំពោះការទិញមុនគម្រោង ប្រសិនបើអ្នកមិនបានធ្វើការស្រាវជ្រាវឱ្យបានល្អិតល្អន់ពីអ្នកអភិវឌ្ឍន៍គម្រោងនោះទេ ពេលខ្លះវាអាចបង្កហានិភ័យខ្ពស់ ដោយសារអ្នកអភិវឌ្ឍន៍ធ្លាប់មានប្រវត្តិមិនល្អសម្រាប់គម្រោងរបស់ខ្លួនកន្លងមក ដោយគ្មានទំនួលខុសត្រូវ ដំណើរការសាងសង់អាចនឹងត្រូវពន្យារពេល សំណង់គ្មានគុណភាព គ្រឿងបរិក្ខារ និងហេដ្ឋារចនាសម្ព័ន្ធផ្សេងៗក្នុងប្លង់មេគម្រោងអាចនឹងខុសពីភាពពិតជាក់ស្តែង នៅពេលគម្រោងកំពុងសាងសង់រួច។ ដូច្នេះសម្រាប់ការទិញផ្ទះបន្ត គឺអ្នកធ្វើការសម្រេចចិត្តទិញជាមួយអ្វីដែលអ្នកមើលឃើញជាក់ស្តែង ទាំងគុណភាពសំណង់ ទាំងគ្រឿងបរិក្ខារផ្សេងៗរបស់គម្រោងទាំងមូល។

៣. អ្នកអាចប៉ាន់ស្មានបានពីបរិយាកាសទូទៅក្នុងគម្រោង និងជុំវិញគម្រោង

អ្នកប្រហែលធ្លាប់ឮពាក្យមួយឃ្លានេះហើយថា “ចង់ទិញផ្ទះកុំឲ្យលេចទឹក គួរទិញខែភ្លៀង”។ វាអាចជារឿងគួរត្រិះរិះពិចារណាដែរ ដោយហេតុថា ប្រសិនជាយើងទិញផ្ទះមុនគម្រោង យើងអាចនឹងមិនអាចធ្វើការប៉ាន់ស្មានបានពីតថភាពជាក់ស្តែងពេលគម្រោងបញ្ចប់ដំណើរការសាងសង់។ ផ្ទុយទៅវិញ ការទិញផ្ទះបន្តអាចឲ្យយើងដឹងពីស្ថានភាពជាក់ស្តែងពីគម្រោងនោះ។ យើងក៏អាចដឹងច្បាស់ថាតើតំបន់នោះមានសុវត្ថិភាពកម្រិតណា មានកន្លែងសំខាន់ៗណាខ្លះស្ថិតក្នុងតំបន់នោះស្រាប់។ ល។

សរុបមកវិញ តើមួយណាគឺជាជម្រើសល្អជាងគេ? ចម្លើយដ៏ល្អបំផុត គឺខ្លួនអ្នកផ្ទាល់ ដែលអាចដឹងច្បាស់ពីតម្រូវការជាក់ស្តែងក៏ដូចជាអាចថ្លឹងថ្លែងថាតើជម្រើសមួយណាសមស្របបំផុតសម្រាប់ខ្លួនអ្នក និងមនុស្សជាទីស្រឡាញ់របស់អ្នក។ ប្រសិនជាអ្នកមានផ្ទះផ្ទាល់ខ្លួនហើយ ប៉ុន្តែមានតម្រូវការវិនិយោគដើម្បីយកផលចំណេញទៅថ្ងៃអនាគតពីការដាក់ជួល ឬលក់ឡើងវិញ នោះការទិញផ្ទះមុនគម្រោងអាចជាជម្រើសល្អ។ ផ្ទុយទៅវិញ ប្រសិនជាអ្នកមានតម្រូវការស្នាក់នៅ ចង់រើអីវ៉ាន់ចូលទៅនៅភ្លាមៗ នៅទីតាំងជាក់លាក់ណាមួយដែលអ្នកគិតថាសមស្របសម្រាប់ស្ថានភាពជាក់ស្តែងរបស់អ្នក ក៏ដូចជាក្រុមគ្រួសារផ្ទាល់ នោះការទិញបន្តពីម្ចាស់មួយទៀតអាចជាជម្រើសល្អក៏ថាបាន”៕​

 

ប្រភពពី៖ Business Cambodia

តាមការគ្រោងទុកស្ពានខ្សែកាបដែលតភ្ជាប់ពីកោះពេជ្រទៅកាន់កោះនរា តម្លៃជិត ៤០ លានដុល្លារ នឹងត្រូវបញ្ចប់ការសាងសង់នៅក្នុងឆ្នាំ២០២៣នេះហើយ។ តើលោកអ្នកដឹងទេថា គិតមកដល់ពេលនេះ គម្រោងស្ពានដ៏សំខាន់នេះសម្រេចការសាងសង់បានប៉ុន្មានភាគរយហើយ?

យោងតាមការដកស្រង់ពីនាយករដ្ឋានព័ត៌មាន នៃទូរទស្សន៍ជាតិកម្ពុជាមុននេះបន្ដិចបានឲ្យដឹងថា គិតត្រឹមថ្ងៃទី ២៩ ខែមីនា ឆ្នាំ២០២៣ ការដ្ឋានសាងសង់ស្ពានខ្សែកាបកោះពេជ្រ-កោះនរា សម្រេចលទ្ឋផលបាន ៦៥% ។ តាមផែនការ គម្រោងនេះ នឹងបញ្ចប់ការសាងសង់នៅចុងឆ្នាំ២០២៣នេះ ។

ប្រភពដដែលក៏បានបញ្ជាក់ផងដែរថា ការសាងសង់ស្ពានតភ្ជាប់កោះពេជ្រ ជាមួយកោះនរានេះ នឹងជួយតភ្ជាប់ចរាចរកណ្តាលរាជធានីភ្នំពេញទៅមកផ្លូវជាតិលេខ ១ ហើយនឹងកាត់បន្ថយការកកស្ទះចរាចរលើស្ពានព្រះមុនីវង្សទាំង២ផងដែរ។

សូមជម្រាបផងដែរថា ស្ពានខ្សែកាបថ្មីនេះត្រូវបានបើកការដ្ឋានសាងសង់នៅក្នុងអំឡុងខែតុលា ឆ្នាំ២០២០។ ស្ពាននេះមានប្រវែង ៨២៤ ម៉ែត្រ កម្ពស់ ៧០ ម៉ែត្រ ចំណាយទុនវិនិយោគ ៣៨លានដុល្លារអាមេរិក និងត្រូវបានសាងសង់ដោយក្រុមហ៊ុនវិនិយោគទុនអណិកជនកម្ពុជា (OCIC) ក្រោមការគ្រប់គ្រងរបស់រដ្ឋបាលរាជធានីភ្នំពេញ៕

 

ប្រភពពី៖ Property Area

ភ្នំពេញ ៖ លោកសន សៀប ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានមានប្រសាសន៍ថា នៅក្នុងរយៈពេលជិត១ត្រីមាសនៃឆ្នាំ ២០២៣នេះ សកម្មភាពទិញលក់និងការវិនិយោគលើវិស័យអចលនទ្រព្យក្នុងប្រទេសកម្ពុជាចាប់ផ្ដើមមាននិន្នាការឡើងបន្តិចម្ដងៗហើយរំពឹងថានៅឆ្នាំ ២០២៤ខាងមុខ ស្ថានភាពកាន់តែប្រសើរបន្ថែមទៀត ។

លោកបន្តថា កាលពីត្រីមាសទី១ឆ្នាំ ២០២២ ការវិនិយោគលើវិស័យអចលនទ្រព្យក៏ដូចជាការទិញលក់ ហាក់នៅមានកម្រិតតិចតួចនៅឡើយ ដោយសារតែដើមឆ្នាំ២០២២ កម្ពុជាទើបតែបើកប្រទេស បើកសេដ្ឋកិច្ចឡើងវិញ ហើយស្ថានភាព កូវីដ១៩ នៅអំឡុងពេលនោះក៏មិនទាន់បានប្រសើរខ្លាំងដូចនៅដើមឆ្នាំ២០២៣នេះដែរ ។

លោកបន្តទៀតថា សម្រាប់ដើមឆ្នាំ ២០២៣នេះ វិនិយោគិនទាំងក្នុងនិងក្រៅប្រទេសចាប់ផ្ដើមចូលមកបណ្ដាក់ទុនវិនិយោគជាបន្តបន្ទាប់ ក្នុងនោះវិនិយោគិនជនជាតិចិន ក៏ចាប់ផ្ដើមចូលមកប្រទេសកម្ពុជាជាបន្តបន្ទាប់ផងដែរ ហើយរពឹងថា វិនិយោគិនចិនដែលធ្លាប់បានចូលមកបណ្ដាក់ទុនវិនិយោគនៅកម្ពុជាម្ដងហើយ នឹងចូលមកឡើងវិញ ហើយវិនិយោគិនថ្មីៗ ក៏នឹងចូលមករកការវិនិយោគនៅកម្ពុជាដែរ ។

យ៉ាងណាក្ដីលោកសន សៀបក៏បានប្រាប់ឱ្យវិនិយោគិនទាំងនិងក្នុងនិងក្រៅប្រទេស ក៏ត្រូវមានការប្រយ័ត្នប្រយែងខ្ពស់ផងដែរ មុននឹងដាក់ទុនវិនិយោគក្នុងពេលដែលស្ថានភាពសេដ្ឋកិច្ចពិភពលោកមិនទាន់មានភាពច្បាស់លាស់និងកំពុងមានបញ្ហានៅបណ្ដាប្រទេសសេដ្ឋកិច្ចរីកចម្រើនធំៗដូចជាអាមេរិកជាដើម ។

អ្នកស្រីអាន សុធីតា នាយិកាប្រតិបត្តិនៃក្រុមហ៊ុន PropNex Cambodia បានមានប្រសាសន៍ផងដែរថា ក្នុងស្ថានភាពបច្ចុប្បន្ននេះ គឺពេលវេលាមួយដែលចាត់ទុកជាងាយស្រួលទិញតែពិបាកលក់ ដូច្នេះហើយទើបក្នុងអំឡូងពេលនេះ មិនសូវមានប្រតិបត្តិការទិញលក់ច្រើន ។ ក្នុងអំឡុងពេលនេះដែរ ម្ចាស់ទ្រព្យគួរគិតផងដែរថាទ្រព្យណាដែលត្រូវលក់ទ្រព្យណាដែលត្រូវទុក ដូចជាទ្រព្យដែលទិញ ទុករយៈពេល៥ឆ្នាំហើយ តែមិនមានសន្ទុះកំណើនតម្លៃ ឬកើនឡើងតិចតួច យើងមិនគួរបន្តទុកទៀតទេ ពីព្រោះទៅមុខទៀតក៏នឹងមិនចំណេញដែរ ដូច្នេះគួរលក់យកលុយទៅវិនិយោគនៅទីតាំងផ្សេងៗអចលនទ្រព្យប្រភេទផ្សេង ។

អ្នកស្រីបន្តថា នៅក្នុងស្ថានភាព ដូចបច្ចុប្បន្ននេះដែរ អ្នកមានលុយគឺមានឱកាសខ្ពស់ក្នុងការវិនិយោគអចលនទ្រព្យរកប្រាក់ចំណេញ ពីព្រោះថាក្នុងករណីនេះ នឹងមានម្ចាស់ទ្រព្យដែលគាត់ត្រូវការហិរញ្ញវត្ថុបន្ទាន់ ហើយត្រូវការលក់ទ្រព្យដើម្បីយកមកដោះស្រាយ ហើយគាត់នឹងលក់ក្នុងតម្លៃទាបជាងទីផ្សារ ដែលធ្វើឱ្យអ្នកទិញអាចលក់វិញនៅពេលបន្ទាប់បានប្រាក់ចំនេញខ្ពស់ ៕

 

ប្រភពពី៖ Property Area

មិនថាប្រាក់ខែតិចឬច្រើនការរៀបចំផែនការថវិកាគ្រួសារមានសារៈសំខាន់ណាស់ក្នុងការគ្រប់គ្រងថវិការបស់អស់លោកអ្នក។ ដោយសារតែផែនការថវិកាបានជួយលោកអ្នកក្នុងការចំណាយបានត្រឹមត្រូវទៅលើរបស់ដែលចាំបាច់ដែលទាំងនោះគេហៅថា ជាតម្រូវការ ដែលចាំបាច់មិនអាចខ្វះបាន។ យ៉ាងណាក៏ជួយសន្សំថវិកាមួយចំនួនសម្រាប់របស់អ្វីមួយដែលលោកអ្នកចូលចិត្ត ឬ ស្រឡាញ់ តែលោកអ្នកអាចរស់ដោយគ្មានវាបាន-ដែលទាំងនោះហើយហៅថា ជាបំណងប្រាថ្នាចង់បានផងដែរ។

ភ្នំពេញៈ អ្នកជំនាញអចលនទ្រព្យជើងចាស់ពីររូប បានលើកឡើងស្រដៀងគ្នាថា ទីផ្សារអចលនទ្រព្យនៅអំឡុងដើមឆ្នាំនេះ បាននិងកំពុងបង្ហាញសញ្ញាវិជ្ជមានច្រើន បើធៀបនឹងរយៈពេលដូចគ្នានឹងឆ្នាំ២០២២។

លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងនាព្រឹកថ្ងៃទី២១ មិនាថា ទីផ្សារអចលនទ្រព្យនៅកម្ពុជាចាប់ផ្តើមមានសញ្ញាល្អប្រសើរ បើទោះបីជាអ្នកវិនិយោគចិន និងអ្នក​វិនិយោគមកពីប្រទេសដទៃ មិនបានផ្តោតខ្លាំងលើវិស័យនេះក្តី ប៉ុន្តែនៅពេលពួកគេមកដល់ នឹងធ្វើឲ្យចរន្តលុយដើរហើយ។

លោកឧកញ៉ាបន្តថា “នៅពេលអ្នកវិនិយោគចូលមក ពួកគេត្រូវការស​ណ្ឋាគារ អាផាតម៉ិន ពួកគេត្រូវការការធ្វើដំណើរ ពួកគេត្រូវការអាហារ ហេតុនេះនឹងធ្វើឲ្យសកម្មភាព ក្នុងសេដ្ឋកិច្ចមានភាពរសរវើក”។លោក​បន្តថា “កុំផ្តោតតែលើវិស័យអចលនទ្រព្យ យើងត្រូវមើលសេដ្ឋកិច្ចទាំងមូល នៅពេលអ្នកទេសចរណ៍ អ្នកធុរកិច្ចមកដល់ មានន័យថា ពួកគេបានយកលុយមកចាយនៅកម្ពុជាហើយ”។

លោកឧកញ៉ាបណ្ឌិតគីម ហ៊ាងបានបន្តថា ប្រសិនជាពួកគេមកដល់ ពួកគេទិញដីសាងសង់រោងចក្រ សហគ្រាសនានា ក៏បានផ្តល់ការងារ ប្រាក់ចំណូលដល់ប្រជាពលរដ្ឋ ហើយនៅពេលប្រជាពលរដ្ឋមានប្រាក់ចំណូល ពួកគេនឹងស្វែងរកលំនៅដ្ឋាន ដីឡូត៍បណ្តើរៗ ហេតុននេះទីផ្សារដីឡូត៍ នឹងដំណើរការឡើងវិញ ប៉ុន្តែអាស្រ័យលើម្ចាស់គំរោងចេះរៀបចំឬអត់។

ជាមួយគ្នានេះ លោកសន សៀបប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ឲ្យដឹងផងដែរថា នៅឆ្នាំ២០២៣នេះ មានលំហូរភ្ញៀវទេសចរណ៍ និងអ្នកវិនិយោគចិនត្រលប់មកវិញ ដែលបានធ្វើឲ្យទីផ្សារចាប់ផ្តើម កំរើកឡើងវិញបណ្តើរៗ ធៀបនឹងឆ្នាំមុន។

លោកបន្តថា “ភ្ញៀវទេសចរណ៍ និងអ្នកវិនិយោគចិនបានទៅមើលគំរោងរបស់ពួកគេ នៅក្រុងព្រះសីហនុ ពួកគេចាប់ផ្តើមរកឱកា​ស​វិនិយោគ ប៉ុន្តែសកម្មភាពជាដុំកំភួន ឬការវិនិយោគធំៗមិនទាន់បានចាប់ផ្តើមនៅឡើយទេ”៕

 

      ភ្នំពេញៈ  អាល្លឺម៉ង់ ជួយរៀបចំយុទ្ធសាស្ត្រជាដំណាក់កាលដំបូង ៦ចំណុចសំខាន់ៗ ដើម្បីប្រែក្លាយខណ្ឌច្បារអំពៅ ជាតំបន់លំនៅឋានបៃតងគំរូក្នុងទីក្រុងភ្នំពេញ។

ព៌តមាននេះ បានលើកឡើងតាមរយៈសិក្ខាសាលាស្តីពី “គម្រោ​ងលំនៅដ្ឋាន ដែលមានចីរភាពសម្រាប់ប្រជាជន (Build4People)» ដែលបានធ្វើ ចាប់ពីថ្ងៃទី២៦ ខែកុម្ភៈ ដល់ថ្ងៃទី០៣ ខែមីនា ឆ្នាំ២០២៣។

គម្រោង Build4People ស្ថិតក្នុងក្របខណ្ឌដៃគូសហប្រតិបត្តិការ រវាងរដ្ឋបាលរាជធានីភ្នំពេញ និងរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដោយទទួលបានការគាំទ្របន្ថែមពីបុរីប៉េង ហួត។

គម្រោងនេះ បានរៀបចំបង្កើតជា Ecocity Transition Lab ដែលនឹងចូលរួម ក្នុងការចែករំលែកបទពិសោធន៍ ក្នុងការរចនា ឌីហ្សាញ គំរូផ្តួចផ្តើមថ្មីៗពាក់ព័ន្ធនឹងសុខុមាលភាព បរិស្ថានរស់នៅល្អ ការគិតគូរពីប្រព័ន្ធអេកូឡូស៊ី ដែលជាគំរូដ៏ល្អមួយសម្រាប់ការអភិវឌ្ឍនៅតាមតំបន់ដទៃទៀតនៃរាជធានីភ្នំពេញ។

សិក្ខាសាលាដែលបានរយៈពេល៥ថ្ងៃនេះ ក៏បានរំលេចចេញនូវយុទ្ធសាស្ត្រ៦ចំណុចសំខាន់ៗ សម្រាប់អនុវត្តក្នុងដំណាក់កាលដំបូង ដើម្បីប្រែក្លាយខណ្ឌច្បារអំពៅ ជាតំបន់លំនៅឋានមានចីរភាពរួមមាន

១. ការរៀបចំក្រុងតាមបែបសមាហរណកម្មរួមមាន

• ការជ្រើសរើសទីតាំង
• ការវិភាគទីតាំង (តំបន់សំបូរខ្យល់ត្រជាក់, សណ្ឋានដី…)។
• បំពេញតម្រូវការជាមូលដ្ឋានរបស់ប្រជាពលរដ្ឋ។
• ការប្រើប្រាស់ចម្រុះ ប្រកបដោយតុល្យភាព/ ហេដ្ឋារចនាសម្ព័ន្ធសង្គ​ម។
• រៀបចំទីធ្លាសាធារណៈសម្រាប់មនុស្សគ្រប់គ្នា។

២. ហេដ្ឋារចនាសម្ព័ន្ធខៀវបៃតងរួមមាន

• ការរៀបចំក្រុង ដែលឆ្លើយតបទៅនឹងកត្តាអាកាសធាតុ។
• ការប្រើប្រាស់ហេដ្ឋារចនាសម្ព័ន្ធខៀវ និងបៃតងនៅក្នុងទីក្រុងជាឧបករណ៍សម្រាប់រៀបចំក្រុង។

៣. ការផ្លាស់ទីប្រកបដោយចីរភាព

• ការអភិវឌ្ឍដែលគិតគូរ ពីការធ្វើដំណើររបស់ប្រជាពលរដ្ឋ។
• រួមចំណែក ដល់ការកសាងសហគមន៍លំនៅដ្ឋាន ដែលមានការប្រើប្រាស់រថយន្តតិចជាងមុន។
• បរិយាកាសមេត្រីភាពសម្រាប់ថ្មើរជើង និងអ្នកជិះកង់។
• គាំទ្រដល់ការប្រើប្រាស់យានជំនិះ ដែលប្រើប្រាស់ឥន្ធនៈពីប្រភពផ្សេងៗ។
• ការធ្វើដំណើរដោយប្រើប្រាស់មធ្យោបាយរួមគ្នា

៤. ការការពារអាកាសធាតុ និងរំហូរថាមពល

• រៀបចំសហគមន៍លំនៅឋាន និងអគារដែលសន្សំសំចៃថាមពល។
• រៀបចំរដ្ឋបាលខណ្ឌផ្តោតលើវដ្ឋជីវិត
• ជំរុញឱ្យមានការកសាងសហគមន៍លំនៅឋាន ដែលមានលក្ខណៈវិលជុំ។

៥. បរិយាបន្នសង្គម និងសេដ្ឋកិច្ចមូលដ្ឋាន

• ឆ្លើយតបចំពោះតម្រូវការលំនៅឋាន
• ជំរុញឱ្យមានការចូលរួម និងភាពចម្រុះនៅក្នុងសង្គម។
• ពង្រឹងសេដ្ឋកិច្ចមូលដ្ឋាន
• ចំណាយក្នុងវដ្តជីវិតជាឧបករណ៍ សម្រាប់ធ្វើការរៀបចំក្រុង

៦. អភិបាលកិច្ច និងការចូលរួម

• បញ្ជូលការគ្រប់គ្រង និងការតាមដានដំណើរការ
• ការចូលរួមរបស់សហគមន៍មូលដ្ឋាន
• បញ្ជូលគោលនយោបាយ និងលិខិតបទដ្ឋានគតិយុត្តពាក់ព័ន្ធ។

ការកំណត់ចេញជាយុទ្ធសាស្ត្រនេះ បានសម្ភាស៍ជាមួយនឹងអ្នកជំនាញ និងសិក្សាលើបញ្ហាការអភិវឌ្ឍទីក្រុង ប្រកបដោយចីរភាព ដោយបានលើកយក បុរី ប៉េង ហួត មកធ្វើគំរូថែមទៀតផង៕

ប្រភពពី៖ Property Area

ភ្នំពេញៈ ក្រុមអ្នកជំនាញបានលើកឡើងស្រដៀងគ្នាថា ការទិញខុនដូទុកសម្រាប់ជួល ជាការវិនិយោគមួយដែលល្អ ព្រោះផលចំណេ​ញពីការវិនិយោគមានអត្រាខ្ពស់។

អគ្គនាយិកាក្រុមហ៊ុនPropNex Cambodia អ្នកស្រីអាន សុធីតា បានមានប្រសាសន៍ឲ្យដឹង តាមបណ្តាញទំនាក់ទំនងសង្គមកាលពីរសៀលថ្ងៃទី៦ មិនាថា បើធៀបនឹងអចលនទ្រព្យដទៃទៀត ចំណូលពីការជួលខុនដូ អាចទទួលបានផលចំណេញ ពីការវិនិយោគប្រមាណ៦ភាគរយក្នុងមួយឆ្នាំ ខណៈអចលនទ្រព្យដទៃទៀតទទួលបានផលចំណេញ៤ ទៅ៥ភាគរយ។

អ្នកស្រីបន្តថា “ប៉ុន្តែអ្វីសំខាន់គឺអ្នកវិនិយោគ ត្រូវរើសខុនដូឲ្យត្រូវ គឺត្រួវទាំងគុណភាព ត្រូវនឹងតម្លៃ ត្រូវទាំងទីតាំង និងពាក់ព័ន្ឋនឹងគំរោងខុនដូផងដែរ”។ អ្នកស្រីបន្តថា “ប្រសិនជាទិញខុនដូ គ្មានគុណភាព មិនមានអតិថិជនចង់ជួលនោះទេ ដែលគុណភាពនៅទីនេះគឺសំដៅដល់គុណភាពសំណង់ ការឌីសាញ និងគុណភាពនៃការគ្រប់​គ្រង និងតម្លៃខុនដូផងដែរ”។

ជាមួយគ្នានេះ លោកញឹម រាសីអគ្គនាយកក្រុមហ៊ុនអចលនទ្រព្យWH ដែលផ្តល់សេវាកម្មដែលជាអ្នកជំនាញគ្រប់គ្រងទ្រព្យជំនួសដើម្បីរកចំណូលជួលជូនម្ចាស់ បានមានប្រសាសន៍ឲ្យដឹងផងដែរថា នៅក្នុងទីផ្សារជួល ខុនដូមានភាពល្អប្រសើរ ដោយសារតែខុនដូភាគច្រើននៅក្នុងទីក្រុង ដែលយើងជួលបានតម្លៃល្អ អាស្រ័យលើទីតាំង អ្នកអភិវឌ្ឈន៍ និងសេវាកម្មគ្រប់គ្រង។

លោកបន្តថា “ខុនដូ មានភាពប្រកួតប្រជែង ជាមួយសេវាអាផាតម៉ិន ប៉ុន្តែខុនដូល្អ ដោយសារយូនីតនិមួយៗដោយសារយូនីតនិមួយៗមានទំហំសមល្មម ជាអាគារថ្មីៗល្អ និងមានសេវាកម្ម បំរើឲ្យការរស់នៅងាយស្រួល ដូចជា កន្លែងហាត់ប្រាណ ស្ទីម សោណា ភោជនីយដ្ឋានជាដើម”។ លោកបន្តថា “ភ្ញៀវចាប់អារម្មណ៍ជួលខុនដូកាន់តែច្រើន ពិសេសខុនដូដែលមានសេវាកម្មគ្រប់គ្រងល្អ គឺសេវាកម្មល្អដូចសេវាកម្មអាផាតម៉ិន”។

លោកញឹម រាសីបានបន្តថា ជាមួយគ្នានេះ ការផ្គត់ផ្គង់ច្រើនក្នុងទីផ្សារ ក៏បានធ្វើឲ្យទីផ្សារមានការប្រកួតប្រជែងខ្ពស់ ប៉ុន្តែផលចំណេញនៅតែខ្ពស់ ដែលមានរហូតដល់៩ ទៅ១២ភាគរយ”។ លោកបន្តថា “ជាក់ស្តែងគំរោងJ Tower ដែលមានបន្ទប់គេង២ និងបីបន្ទប់គេង និងPen House តម្លៃមិនបានស្រុតចុះនោះទេ ដោយសារមិនមានការប្រកួតប្រជែងច្រើន”។

លោកញឹម រាសីបានបន្តទៀតថា ការជួលផ្ទះភាគច្រើន មាននៅក្នុងបុរីធំៗដួចជា បុរីប៉េង ហួត និងផ្ទះដែលអាចប្រកបអាជីវកម្មបាន ប៉ុន្តែក្នុងស្ថានភាពបច្ចុប្បន្ន សម្រាប់អ្នកធ្វើការភាគច្រើនគាត់នៅខុនដូ តែក្រុមគ្រួសារដែលមានសមាជិកច្រើន ពួកគេជ្រើសរើសជួលនៅតាមបុរីផងដែរ។

ជាមួយគ្នានេះ លោកខន គង្គាអគ្គនាយកក្រុមហ៊ុនERA Cambodiaបានមានប្រសាសន៍ឲ្យដឹងផងដែរថា ការទិញខុនដូទុកសំរាប់ជួលក្នុងកាលៈទេសៈបែបនេះ មានភាពល្អប្រសើរណាស់ដោយ​សារអ្នកទិញទទួលបានតម្លៃល្អ និងអត្រាជួលទទួលបានតម្លៃខ្ពស់។

លោកបន្តថា “ជនបរទេសមួយចំនួន ពួកគេកំពុងមើលគំរោងមួយចំនួន ដើម្បីទិញ៥០ទៅ១០០យូនីត ឬ១អាគារ ដើម្បីរៀបចំជាសណ្ឋា​គារឬខុនដូថែល”។ លោកបន្តថា “អត្រាចំណេញពីការវិនិយោគខុនដូសម្រាប់ជួល មានអត្រាចន្លោះពី៦ទៅ១២ភាគរយក្នុងមួយឆ្នាំ”៕

ប្រភពពី៖ Property Area