សព្វថ្ងៃនេះ ប្រសិនបើយើងចង់ស្វែងរកគេហដ្ឋានសមល្មមមួយសម្រាប់រស់នៅជុំគ្រួសារ ប្រាកដជាមានភាពងាយស្រួលដោយសារតែក្រុមហ៊ុនអភិវឌ្ឍន៍លំនៅដ្ឋាន មានច្រើនកន្លែងនិងគ្រប់កម្រិតទៅតាមតម្រូវការជាក់ស្ដែងរបស់យើង ហើយវាគឺជាវិនិយោគ ឬជាការសន្សំទ្រព្យសម្រាប់គ្រួសារ។ ប៉ុន្តែអ្វីដែលពិបាកនោះគឺតម្លៃ ព្រោះថាបច្ចុប្បន្ននេះតម្លៃលំនៅដ្ឋានមិនទាបនោះទេ វាសមស្របទៅតាមប្រភេទផ្ទះ ទំហំ និងទីតាំង -ល- ដូចនេះតម្រូវឲ្យយើងត្រូវពិចារណាឲ្យបានល្អិតល្អន់ជាមុនសិន នៅពេលសម្រេចចិត្តទិញផ្ទះ ឬបង់រំលស់ផ្ទះ។ ផ្ទះអាជីវកម្ម ឬហ្សបហោស៍ គឺជាប្រភេទផ្ទះដែលកំពុងតែពេញនិយមមួយរបស់អ្នកស្វែងរកគេហដ្ឋានថ្មីសម្រាប់រស់នៅ ហើយយើងក៏បានឃើញក្រុមហ៊ុនអ្នកអភិវឌ្ឍន៍ជាច្រើនកំពុងយកចិត្តទុកដាក់ផងដែរ ដូចនេះយើងនឹងមកស្វែងយល់នូវហេតុផល ៥ ចំណុចដែលអ្នកមនុស្សជាច្រើនតែងពិចារណាទិញផ្ទះអាជីវកម្ម។

១. កសាងប្រាក់ចំណូល

ជាការពិតណាស់ នៅពេលដែលយើងសម្រេចចិត្តទិញផ្ទះអាជីវកម្ម យើងប្រាកដជាមានបំណងនិងក្ដីស្រមៃក្នុងចិត្តរួចជាស្រេច ថាតើអ្នកនឹងទិញផ្ទះនោះបើកអាជីវកម្មអ្វីមួយមិនខាន។ ផ្ទះអាជីវកម្មគឺជាអចលទ្រព្យមួយដែលអាចរកចំណូលឲ្យយើងបានប្រចាំខែ ប្រចាំថ្ងៃ ប្រសិនបើអាជីវកម្មរបស់យើងដំណើរការទៅមុខល្អ ហើយវាក៏មានភាពងាយស្រួលក្នុងការកែច្នៃបើកជាការិយាល័យក្រុមហ៊ុនធ្វើការ ឬសេវាកម្មផ្សេងៗផងដែរ។ អញ្ចឹងហើយបានជាមនុស្សមួយចំនួននិយាយថា ប្រើប្រាស់អចលនទ្រព្យដែលអាចបង្កើតទ្រព្យឲ្យយើងបាន នោះគឺជាលំហូរប្រាក់ចំណូលដែលមិនទាល់។

២. ទីតាំងល្អ

ជាទូទៅ ការអភិវឌ្ឍន៍ផ្ទះអាជីវកម្ម ក្រុមហ៊ុនភាគច្រើនតែងតែជ្រើសរើសយកទីតាំងដែលមានចន្លោះសម្រាប់ការអភិវឌ្ឍន៍ទៅមុខបានវែងឆ្ងាយ ហេតុនេះហើយទើបផ្ទះហ្សបហោស៍ទាំងនោះអាចរកស៊ី ឬប្រកបអាជីវកម្មបានល្អ។ ជាក់ស្ដែងទីតាំងនៃការអភិវឌ្ឍន៍ផ្ទះអាជីវកម្ម បច្ចុប្បន្នមានភាពល្អប្រសើរទៅតាមនោះដែរ ដោយផ្ទះអាជីវកម្មស្ថិតនៅទីប្រជុំជន ខាងមុខផ្លូវមានមនុស្សរស់នៅច្រើន ក្នុងតំបន់ពាណិជ្ជកម្មងាយស្រួលប្រើប្រាស់សេវាសាធារណៈនានា ដូចជាសាលារៀន មន្ទីពេទ្យ ផ្សារទំនិញ វត្តអារាម ស្ថានីយ៍ពន្លត់អគ្គីភ័យ កន្លែងកម្សាន្ដ -ល-។ ប្រសិនបើនៅទីក្រុងហិរញ្ញវត្ថុធំៗ ដូចជានៅហុងកុង ឬសិង្ហបុរី ការអភិវឌ្ឍន៍ហ្សបហោស៍ គឺមានចំនួនកំណត់ ហើយតម្លៃក៏ថ្លៃខ្ពស់ខ្លាំងផងដែរ។

៣. ទីធ្លារ និងម៉ូដរចនា

ក្រុមហ៊ុនអ្នកអភិវឌ្ឍន៍ សុទ្ធសឹងតែមានភាពច្នៃប្រឌិតម៉ូដផ្ទះអាជីវកម្មទៅតាមស្ដង់ដាររបស់គេរៀងៗខ្លួន ប៉ុន្តែផ្ទះអាជីវកម្មដែលពេញនិយមសព្វថ្ងៃនេះគឺកម្ពស់ចាប់ពី ២ ជាន់ឡើង មានទីធ្លារទូលាយល្អសម្រាប់ប្រកបអាជីវកម្ម ជាមួយនឹងម៉ូដរចនាស្អាតៗដែលស្ទើរតែមិនចាប់បាច់តុបតែងច្រើននោះទេ។ ជាទូទៅរចនាបថនៃផ្ទះអាជីវកម្មងាយស្រួលបត់បែន ដែលល្អសម្រាប់ការរស់នៅ, ការិយាល័យក្រុមហ៊ុន, សេវាកម្ម ឬអាជីវកម្ម។

៤. សម្រួលដល់ហិរញ្ញវត្ថុ

អ្នកណាៗក៏ចង់បានផ្ទះក្នុងក្ដីសុបិន្ដដែរ ប៉ុន្តែអ្វីដែលចំណុចទើសទាល់នោះគឺផ្នែកហិរញ្ញវត្ថុ ជាក់ស្ដែងគេហដ្ឋានបច្ចុប្បន្នមានតម្លៃថ្លៃ ដូចនេះយើងត្រូវពិសេសចារទៅលើការចំណាយហិរញ្ញប្បទានយ៉ាងដូចម្ដេច? គួរបង់ផ្ដាច់ឬបង់រំលស់? មនុស្សជាច្រើនតែងតែជ្រើសរើសយកការបង់រំលស់ដោយសារតែទុកសាច់ប្រាក់ដើម្បីបើកអាជីវកម្មរបស់ខ្លួន ហើយសុខចិត្តបង់រំលស់ដើម្បីខាតការប្រាក់ ប៉ុន្តែវាជាជំរើសដ៏ល្អមួយសម្រាប់ផ្ទះអាជីវកម្ម ដែលវានឹងសម្រួលដល់ការបង់រំលស់របស់ពួកគេ ដោយសារតែគេអាចទទួលបានចំណូលជាប្រចាំពីអាជីវកម្ម បើទោះជាមិនទាន់មានអាជីវកម្មផ្ទាល់ខ្លួន ក៏គេអាចដាក់ជួលនៅក្នុងតម្លៃខ្ពស់សមរម្យមួយដែរ។

៥. ងាយស្រួលលក់ចេញ

ជាទូទៅការទិញផ្ទះមិនប្រាកដថាយើងនឹងមានបំណងរស់នៅទីនោះរហូតនោះទេ ពេលខ្លះក៏ត្រូវការលក់ចេញ ទិញកន្លែងធំជាងមុន ឬពង្រីកអាជីវកម្មឲ្យធំជាងមុនជាដើម។ សម្រាប់ផ្ទះអាជីវកម្មគឺជាផ្ទះដែលងាយស្រួលលក់ចេញមួយ និយាយឲ្យចំគឺមានហាងឆេងច្រើន ហើយអ្វីដែលសំខាន់បន្ថែមនោះ តម្លៃផ្ទះក៏តែងតែឡើងខ្ពស់ជាងមុនពីមួយឆ្នាំទៅមួយឆ្នាំផងដែរ ដូចនេះការទិញផ្ទះទុកក៏ចំណេញច្រើន មិនចាញ់ការទិញដីទុកនោះដែរ។

កាលពីថ្ងៃទី២៦​ ខែកុម្ភៈ ឆ្នាំ២០២០នេះ លោកង៉ែតជូ​ដែលជាអ្នកជំនាញក្នុងវិស័យអចលនទ្រព្យ បានធ្វើការបង្ហោះលើហ្វេសប៊ុករបស់លោកឱ្យដឹងថា “វិធីសាស្រ្ត៤យ៉ាងក្នុងការវិនិយោគលើវិស័យអចលនទ្រព្យ” ដែលអ្នកអាចរៀនពីវិធីសាស្រ្តវិនិយោគលើផ្សារហ៊ុនរបស់លោក Warren Buffett ។

វិធីសាស្រ្តទាំង ៤នោះរួមមាន៖

១) ជ្រើសរើសការវិនិយោគលើក្រុមហ៊ុនដែលមានភាពទាក់ទាញ៖

ជាទូទៅលោក Warren Buffett វិនិយោគតែលើក្រុមហ៊ុនដែលមានតម្លៃស្នូល (Intrinsic value) អាចបង្កើតកំរិតផលចំណេញបានជាទីគាប់ចិត្ត។ លោកមិនផ្តោតការវិនិយោគភាគហ៊ុនរបស់ក្រុមហ៊ុន ហើយដេកចាំលក់ចេញនៅពេលតម្លៃហ៊ុនឡើងថ្លៃនោះទេ។ ដូចគ្នានេះដែរ អ្នកគួរវិនិយោគលើប្រភេទអចលនទ្រព្យដែលមានតម្លៃផ្នែកសេដ្ឋកិច្ច ពោលគឺអាចរកចំណូលបានដូចជាការជួលដី ឃ្លាំង។ល។ ធ្វើដូច្នេះ អ្នកមិនមែនទិញអចនទ្រព្យទុកកប់លុយចោលហើយរង់ចាំពេលលក់យកចំណេញនោះទេ។

២) ចាត់ទុកការវិនិយោគលើផ្សារហ៊ុនជាមុខរបរ៖

លោកចាត់ទុកការវិនិយោគជាមុខរបរ មិនមែនគ្រាន់តែទិញលក់យកចំណេញតែមួយគ្រាៗនោះទេ។ ធ្វើដូច្នេះទើបលោកអាចគ្រប់គ្រងចាត់ចែងផលបត្រ័ (Portfolio) វិនិយោគបានល្អព្រោះលោកនៅជាប់ជាមួយនឹងទីផ្សារ ហើយក្តាប់ព័ត៌មានបានច្បាស់ល្អ។ ការណ៍នេះវាផ្ទុយទាំងស្រុងពីអ្នកវិនិយោគលើផ្សារហ៊ុនទូទៅដោយគ្រាន់តែទិញ-លក់យកចំណេញក្នុងរយៈពេលខ្លីហើយក្តាប់ព័ត៌មានមិនបានល្អដែលជាបច្ច័យនាំអោយមានការសំរេចចិត្តខុស។ ដូចគ្នានេះដែរ អ្នកវិនិយោគលើវិស័យអចលនទ្រព្យគួរចាត់ទុកថាការវិនិយោគរបស់ខ្លួនជាមុខរបរហើយកសាងសមត្ថភាពអោយខ្លាំងជាសជាងការវិនិយោគតាមបែបទឹកជោរទឹកនាចដូចមនុស្សទូទៅ។

៣) វិនិយោគលើអ្វីដែលអ្នកស្គាល់ច្បាស់៖

លោកមិនវិនិយោគលើវិស័យណាដែលលោកមិនយល់ច្បាស់នោះទេព្រោះចៀសវាងកំហុសឆ្គងនៅក្នុងការសំរេចចិត្ត។ ដូចគ្នានេះដែរ ប្រសិនបើអ្នកចង់អោយការវិនិយោគលើអចលនទ្រព្យទទួលបានភាពជោគជ័យខ្ពស់ អ្នកគួរផ្តោតតែទៅលើប្រភេទអចលនទ្រព្យដែលអ្នកយល់ដឹងច្បាស់។ ឧទាហរណ៍ ដូចជាការផ្តោតលើការវិនិយោគលើដីជាយក្រុងនៅតំបន់ភ្នំប្រសិទ្ធិ ឬតំបន់អរិយ្យក្សត្រ។ល។ អ្នកនឹងមិនអាចជោគជ័យខ្លាំងនោះទេ ប្រសិនបើអ្នកធ្វើខុនដូលក់ផង និងវិនិយោគលើដីធ្លីនៅជាយក្រុងផងនោះ។

៤) មានវិន័យ និងវិនិយោគសំរាប់រយៈពេលវែង៖

លោកមិនស្លន់ស្លោរ រួចលក់ហ៊ុនចេញនៅពេលដែលស្ថានភាពសេដ្ឋកិច្ចមិនសូវអំណោយផលនោះទេ។ ជាទូទៅលោកវិនិយោគរយៈពេលវែង បើស្ថានភាពសេដ្ឋកិច្ចមិនសូវល្អហើយតម្លៃហ៊ុនធ្លាក់ចុះ លោកផ្តោតលើការទិញហ៊ុនបន្ថែមក្នុងតម្លៃទាប។ ការប្រព្រឹត្តរបស់លោកផ្ទុយពីឥរិយាបទនៃអ្នកវិនិយោគទូទៅ។ ដោយឡែកការវិនិយោគលើអចលទ្រព្យក៏គួរយកគំរូតាមលោកWarren Buffett ត្រង់ចំនុចវិន័យ និងចក្ខុវិស័យរយៈពេលវែងនេះដែរ។ អញ្ចឹងហើយយុទ្ធសាស្រ្តធនាគារដីធ្លី Land Banking ជាយុទ្ធសាស្រ្តសមស្របបំផុត ជាពិសេសសំរាប់អនុវត្តនៅប្រទេសដែលសេដ្ឋកិច្ចមានការរីកលូតលាស់លឿនដូចប្រទេសកម្ពុជា។

ក្រសួងសេដ្ឋកិច្ច និងហិរញ្ញវត្ថុ បានអំពាវនាវដល់សាធារណជនមេត្តាយល់ដឹងនូវព័ត៌មានសំខាន់ៗមួយចំនួន មុនធ្វើការសម្រេចចិត្តទិញលំនៅដ្ឋាន ឬការទិញដីឡូត៍ក្នុងគោលបំណងជួយឱ្យការទិញ-លក់ អចលនទ្រព្យ (ដីឡូត៍ និងផ្ទះ) អាចប្រពឹត្តទៅដោយសុវត្ថិភាព និងអាចជៀសវាងហានិភ័យជាយថាហេតុ ដែលបង្កឡើងដោយជនខិលខូច។

*ព័ត៌មានសំខាន់ៗមួយចំនួនមុន ធ្វើការសម្រេចចិត្តទិញលំនៅដ្ឋានឬការទិញដីឡូត៍មានដូចខាងក្រោម៖

ក) ព័ត៌មានសម្រាប់ការទិញដីឡូត៍

១- ឈ្មោះម្ចាស់អចលនទ្រព្យក្នុងវិញ្ញាបនបត្រសម្គាល់អចលនទ្រព្យ (តើជារបស់អ្នកអភិវឌ្ឍគម្រោងពុះដីឡូត៍លក់ ឬ ជារបស់អ្នកផ្សេង។

២- វិញ្ញាបនប័ត្រសម្គាល់អចលនទ្រព្យ (មានជាប់បន្ទុក ឬអត់)

៣- លិខិតអនុញ្ញាតអភិវឌ្ឍដីដែលចេញដោយអាជ្ញាធរ ឬ អង្គភាពមានសមត្ថកិច្ច (ដូចមានចែងក្នុងប្រកាសលេខ០៨៧ ដ.ន.ស ប្រក/និក. ចុះថ្ងៃទី ១១ ខែឧសភា ឆ្នាំ ២០១៨ ស្តីពីការអភិវឌ្ឍដីរបស់ក្រសួងរៀបចំដែនដី នគរូបនីយកម្ម និងសំណង់។

៤- ឯកសារបង់ពន្ធអចលនវត្ថុ

៥- បណ្ណបំបែកក្បាលដី

៦- ខ្លឹមសារលម្អិតនៃកិច្ចសន្យាលក់-ទិញ។

ខ) ព័ត៌មានសម្រាប់ការទិញលំនៅឋាន

១- លិខិតអនុញ្ញាតសាងសង់ (ចេញដោយក្រសួងរៀបចំដែនដី នគរូបនីយកម្មនិងសំណង់ ឬសាលារាជធានីភ្នំពេញ)

២- វិញ្ញាបនប័ត្រសម្គាល់ម្ចាស់អចលវត្ថុទ្រព្យ (មានជាប់បន្ទុក ឬអត់)

៣- អាជ្ញាបណ្ណអភិវឌ្ឍលំនៅឋាន (ចេញដោយក្រសួងសេដ្ឋកិច្ច និងហិរញ្ញវត្ថុ)

៤- ឯកសារបង់ពន្ធអចលនវត្ថុ

៥- បណ្ណបំបែកក្បាលដី

៦- ខ្លឹមសារលម្អិតនៃកិច្ចសន្យាលក់-ទិញ។

ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុ ក៏បានចេញសេចក្តីជូនដំណឹងមួយ ដែលអំពាវនាវដល់សាធារណជនទាំងអស់ ឱ្យមានការប្រុងប្រយ័ត្នខ្ពស់ ចំពោះការទិញអចលនទ្រព្យដែលគ្មានអាជ្ញាប័ណ្ណ ហើយត្រូវបានផ្សព្វផ្សាយ នៅតាមបណ្ដាញសង្គម Facebook នឹងតាមព័ត៌មានផ្សេងៗ៕

អត្ថបទ៖ ដារ៉ូ

ខ្ញុំជាអ្នចែករំលែកព័ត៌មានអចនទ្រព្យ

លេខទំនាក់ទំនង៖ ០១៦ ៦៣១ ៥២៥

សម្រាប់អ្នករកស៊ីក្នុងវិស័យណាក៏ដោយត្រូវមានគោលការណ៍សម្រាប់អភិវឌ្ឍន៍ខ្លួនដើម្បីជាកម្លាំងជំរុញចិត្តអោយខិតខំប្រឹងប្រែង តស៊ូគ្រប់ឧបសគ្គ ។ ជាទូទៅការរកស៊ី ឬការវិនិយោគមិនមែនងាយស្រួលដូចជានិយាយនោះទេ ត្រូវមានសកម្មភាព នឹងទម្លាប់រៀនសូត្រពីការងារនោះ ព្រោះបើគ្រាន់តែនិយាយងាយស្រួលនោះទេ ប៉ុន្តែធ្វើសកម្មភាពទើបពិបាក ។

តាមរយះលោក​បណ្ឌិត​ គឹម ហ៊ាង ​ម្ចាស់​ក្រុមហ៊ុន KHMER REAL ESTATE បាន​លើក​ឡើង​ថា​៖ «នៅ​ក្នុង​វិស័យ​ដី​ធ្លី​គឺ​ក្នុង​ចំណោម​មនុស្ស​១០០​នាក់ ភាគរយ​ជោគ​ជ័យ​ មាន៩៧​ទៅ​៩៨​ភាគរយ​គឺ​គ្មាន​លុយ​នោះ​ទេ ហើយនៅក្នុងចំណោម​នោះ​មាន​មួយ​ទៅ​ពីរ​នាក់ប៉ុណ្ណោះដែល​អាច​រកបាន​ត្រឹម​តែ​មួយ​រស់ៗ ហើយ​មានតែ​​ម្នាក់​ប៉ុណ្ណោះ​អាច​ក្លាយ​ជា​អ្នក​មាន​តែ​ម្ដង។ ហើយលោកបានបង្ហើបគន្លឹះ៥ចំណុច ដើម្បីជាគោលដៅក្នុងការជោគជ័យោនៅលើវិស័យដីធ្លីដោយគន្លឹះនីមួយៗមាន៖

ទី១-​ បុគ្គល​ត្រូវ​មាន​ចំណេះ​ដឹង​ទូទៅ៖មាន​ន័យ​ថា​ បុគ្គល​នោះ​យ៉ាង​ហោច​ណាស់​ក៏​ត្រូវ​មាន​ចំណេះ​ដឹង​ត្រឹម​ថ្នាក់​មហាវិទ្យាល័យ​ដែរ ដោយ​ក្នុង​នោះ​អ្នក​ត្រូវ​យល់​ដឹង​ផ្នែក​ភូមិសាស្រ្ត យល់​ដឹង​អំពី​សេដ្ឋកិច្ច យល់​ដឹង​អំពី​និន្នាការ​នយោបាយ យល់​ដឹង​អំពីការ​អភិវឌ្ឍ​ទីក្រុង យល់​អំពី​អត្តចរឹត​របស់​មនុស្ស ចេះ​ភាសា​បរទេស ទាំង​នេះ​សុទ្ធ​តែ​ជា​ចំណេះ​ដឹង​ទូទៅ​ដែល​អ្នក​ត្រូវ​មាន។
ទី​២- ​​ត្រូវ​មាន​ចំណេះ​ដឹង​ដី​ធ្លី ឬ​ចំណេះ​ដឹង​ជំនាញ៖គឺ​អ្នក​ត្រូវ​តែ​ជា​មនុស្ស​ដែល​ចេះ​វាយ​តម្លៃ​ដីធ្លី ចេះ​ទិញ​ដីធ្លី ព្រម​ទាំង​ត្រូវ​ចេះ​គិត​គូរ​ដល់​អ្នក​ដទៃ ពោល​គឺ​ចាំ​បាច់​ត្រូវ​តែ​មាន​ជំនាញ​វិជ្ជា​ជីវៈ​ច្បាស់​លាស់​នៅ​ក្នុង​វិស័យ​នេះ។

ទី៣- ត្រូវ​ចេះមាន​ទំនាក់​ទំនង​៖ឧទាហរណ៍​ថា​អ្នក​លក់​របស់​ដែល​មាន​តម្លៃ​១លាន​ដុល្លា តែ​បើ​សិន​ជា​អ្នក​មិន​ស្គាល់​អ្នក​ធំ​ មិន​ស្គាល់​អ្នក​ដែល​មាន​លុយ​ផង​តើ​អ្នក​លក់​ធ្វើ​ម៉េច​នឹង​ដាច់​ ដូច្នេះ​អ្នក​ចាំបាច់​ត្រូវ​តែ​មាន​ទំនាក់​ទំនង​នៅ​ក្នុង​សង្គម​ឱ្យបាន​ទូលំទូលាយ​មិន​ថា​អ្នក​ធំ​ អ្នក​តូច ឬ​អ្នក​មាន​អ្នក​ក្រ​នោះ​ឡើយ។

ទី៤-លោក​បណ្ឌិត​បាន​លើក​ឡើង​ថា អាជីវកម្ម​ប្រភេទ​នេះ​ប្រៀប​ដូច​ជា​ការ​ដាំ​ដើម​ត្នោត​ដែរមាន​ន័យ​ថា ​មិន​មែន​យើង​រកស៊ី​ភ្លាម​បាន​លុយ​ភ្លាម​នោះ​ទេ លោក​បន្ត​ថា​សម្រាប់​លោក​ លោក​បាន​ចំណាយ​ពេល​រហូត​ដល់​១២​ឆ្នាំ​ក្នុង​ការ​វិនិយោគនេះដើម្បីទទួលបានបទពិសោធន៍កាន់តែច្រើន​ ដោយ​ឡែក​សម្រាប់​មនុស្ស​មួយ​ចំនួន​វិញ​ទើប​តែ​ចាប់​ផ្ដើម​បាន​រយៈបេល ​១ឆ្នាំ​ជាងសោះ ហើយ​ចង់​ក្លាយ​ជា​អ្នក​មានតែម្តង ​គឺ​ពិត​ជា​មិន​អាច​នោះទេ ដូច្នេះ​អ្នក​ត្រូវ​តែ​ជា​មនុស្ស​ដែល​មាន​ចិត្ត​អំណត់​ក្នុង​ការ​រង់ចាំ។

ទី៥- មាន​ទេពកោសល្យ​៖ “មនុស្ស​មួយ​ចំនួន​រកស៊ី​អ្វី​ក៏​ខាត​ដែរ​ ប៉ុន្តែ​មក​រកស៊ី​ក្នុង​វិស័យ​នេះ​បែរជា​ចំណេញ ខ្ញុំ​លក់​បាន​ច្រើន​មិន​មែន​ខ្ញុំ​ពូកែ​នោះ​ទេ បុគ្គលិក​របស់​ខ្ញុំ​ខ្លះ​គាត់​និយាយ​ថា​មេ​មិន​សូវ​ពូកែ​ទេ​តែ​ហេតុ​អី​មេ​អាច​លក់​បាន​ច្រើន​ ខ្ញុំ​ថា​មក​ពី​មាន​ដុង(ទេពកោសល្យ)​ ទោះ​បី​ជា​ប្អូន​ចេះ​ច្រើន​ជាង​ខ្ញុំ​មែន​ប៉ុន្តែ​បើ​ប្អូន​គ្មាន​ដុង​ខាង​លក់​ទេ​ប្អូន​លក់​យ៉ាងម៉េច​នឹង​ដាច់” នេះ​ជា​ការ​លើក​ឡើង​របស់​លោក​បណ្ឌឹត គឹម ហ៊ាង៕

ភ្នំពេញ៖ ក្រសួងរៀបចំដែនដី និងគរូបនីយកម្ម និងសំណង់ គ្រោងសហការជាមួយអគ្គនាយកពន្ធដារដាក់ឱ្យមានការប្រមូលពន្ធលើអចលនទ្រព្យនៅកន្លែងច្រកចេញចូលតែមួយ (One Window Service) ដើម្បីប្រមូលពន្ធលើវិស័យអចលនទ្រព្យឱ្យកាន់តែមានប្រសិទ្ធភាពខ្ពស់ និងបានកាន់តែdfលឿនជូនដល់ប្រជាពរដ្ឋនាពេលខាងមុខ។

លោក សេង ឡូត អ្នកនាំពាក្រសួងរៀបចំដែនដី នគរូបនីយកម្ម និងសំណង់ នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងរៀបចំដែនដី នគរូបនីយកម្ម និងសំណង់» នាថ្ងៃទី ១៦ ខែមីនា ឆ្នាំ ២០២០ នេះ ឱ្យដឹងថា ក្រសួងរៀបចំដែនដី នគរូបនីយកម្ម និងសំណង់កន្លងមកនេះ បានពិភាក្សានៅក្នុងក្របខណ្ឌផ្ទៃក្នុងអស់រយៈពេល៣ ដងរួចហើយ តែមិនទាន់បានមានកិច្ចប្រជុំពិភាក្សាជាមួយអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថនៅឡើយទេ ។

តែយ៉ាងណាក៏ដោយ លោកបន្តថា បានជំរាបដល់អគ្គនាយកដ្ឋានពន្ធដារដើម្បីពនិត្យមើលលទ្ធភាពទៅលើមន្ត្រីរបស់ខ្លួនមានចំនួនគ្រប់គ្រាន់អាចបញ្ជូនមកទទួលពន្ធនៅអង្គភាពច្រកចេញចូលតែមួយនៅថ្នាក់រដ្ឋបាលក្រោមជាតិបានឬទេ។

លោកបន្ថែមទៀតថា “ពីមុនច្រកចេញចូលតែមួយនៅមន្ទីររៀចំដែនដីនគរូបនីយកម្ម និងសំណង់ និងសូរិយោដី តែក្រោយមកយើងបានអនុវត្តតាមអនុក្រឹត្យរបស់រាជរដ្ឋាភិបាល ក៏ក្រសួងបានបញ្ជូនទៅនៅក្រោមរដ្ឋបាលរាជធានីខេត្តវិញ។

លោកបន្ថែមទៀតថា “ខាងពន្ធដារកំពុងធ្វើកិច្ចការនេះ ហើយខ្ញុំជឿថា មិនយូមិនឆាប់ យើងនឹងទទួលបានព័ត៌មានជាវិជ្ជមានពីអគ្គនាយដ្ឋានពន្ធដារ ដើម្បីរួមគ្នាធ្វើយ៉ាងមិចជំរុញឱ្យការផ្តល់សេវាសាធារណៈនេះ បានកាន់តែលឿន និងប្រសើរជាងមុន”។
លោកសេង ឡូតបន្ថែមថា “ហើយខ្ញុំនៅតែជឿថា កិច្ចការនេះ នៅដំណើរការទៅបានដោយសារតែមានការកើនឡើងនូវបច្ចេកវិទ្យាទំនើបនាពេលបច្ចុប្បន្ននេះ”។

ការិយាល័យច្រកចេញចូលតែមួយ ជាកន្លែងដែលអតិថិជនត្រូវបានទទួលទម្រង់បែបបទ ព័ត៌មានគ្រប់គ្រាន់ ច្បាស់លាស់ស្ដីពីការផ្ដល់សេវារដ្ឋបាល កម្រៃសេវា និងអាករផ្សេងៗ និងជាកន្លែងផ្ដល់នូវលទ្ធផលសម្រេចជាផ្លូវការលើសេចក្ដីស្នើសុំដល់អតិថិជនវិញ។

សេចក្តីសម្រេចស្ដីពីការបង្កើតច្រកចេញចូលតែមួយ និងការិយាល័យប្រជាពលរដ្ឋ នៅថ្នាក់ស្រុក ខណ្ឌ ត្រូវបានសម្ដេច ហ៊ុន សែន ប្រមុខរដ្ឋាភិបាលកម្ពុជា ចុះហត្ថលេខាកាលពីថ្ងៃទី៣០ មិថុនា ២០០៨បានឱ្យដឹងថាការិយាល័យច្រកចេញចូលតែមួយ មានសមត្ថកិច្ចផ្ដល់ជូនប្រជាពលរដ្ឋ ក្រុមហ៊ុន និងសហគ្រាសនូវសេវារដ្ឋបាល ដែលប្រជាពលរដ្ឋ ក្រុមហ៊ុន និងសហគ្រាសត្រូវការជាប្រចាំ ឲ្យបានទាន់ពេលវេលា មានតម្លាភាព តាមនីតិវិធី និងមានប្រសិទ្ធភាព៕

ភ្នំពេញៈ មហាវិថីព្រះសីហនុដែលគិតចាប់ពីត្រឹមម្តុំអាងទឹកអូឡាំពិក រហូតមកដល់ចំណុចបំបែកផ្លូវសុធារស់ ត្រូវបានអ្នកជំនាញបញ្ជាក់ប្រាប់ថា គឺជាផ្លូវដ៏សំខាន់មួយ និងមានតម្លៃអចលនទ្រព្យខ្ពស់ មិនចាញ់មហាវិថីអាជីវកម្មចម្រុះដទៃទៀត នៅក្នុងរាជធានីភ្នំពេញនោះឡើយ ហើយក្នុងនោះមានផ្ទះល្វែងខ្លះ អាចមានតម្លៃរហូតដល់ជាង១លានដុល្លារក៏មានដែរ។

នៅក្នុងរាជធានីភ្នំពេញ ចំពោះមហាវិថី និងផ្លូវសំខាន់ៗមួយចំនួនដែលត្រូវបានអ្នកជំនាញ ក៏ដូចជាបណ្តាអ្នកវិនិយោគលើវិស័យអចលនទ្រព្យ ចាត់ទុកថាជាផ្លូវមេផ្នែកអាជីវកម្មរួមមានដូចជា ផ្លូវកម្ពុជាក្រោម ផ្លូវព្រះមុនីវង្ស ផ្លូវម៉ៅសេទុង មហាវិថីព្រះនរោត្តម រួមជាមួយនឹងផ្លូវហ្សាឌឺហ្គោល នោះ សម្រាប់មហាវិថីព្រះសីហនុ ក៏ជាផ្លូវមួយដែលស្ថិតនៅក្នុងចំណោមផ្លូវសំខាន់ៗទាំងអស់ខាងលើនេះផងដែរ។

នាយិកាក្រុមហ៊ុន AMATAK Property Service លោកស្រីតាំង ហួរបានមានប្រ​សាសន៍ប្រាប់តាមរយៈទូរស័ព្ទកាលពីពេលថ្មីៗនេះថា មហាវិថីព្រះសីហនុ ក៏ត្រូវបានចាត់ជាផ្លូវដែលមានសក្ដានុពល ក្នុងការប្រកបអាជីវកម្មចម្រុះផងដែរ ហើយនៅតាមបណ្តោយផ្លូវមួយខ្សែនេះក៏មិនសូវមានដីធំៗ និងទំនេរសម្រាប់ធ្វើការអភិវឌ្ឍ ជាមជ្ឍមណ្ឌលពាណិ​ជ្ជកម្ម ដែលមានទំហំធំនោះដែរ។

លោកស្រីបន្តថា “ភាគច្រើននៅតាមបណ្តោយផ្លូវនេះ ជាប្រភេទផ្ទះល្វែងទាំងអស់ ហើយក៏សុទ្ធតែមានបើកអាជីវកម្មទាំងអស់”។លោកបន្តថា “ដោយសារតែតំបន់នេះមិនសូវមានផ្ទៃដីទំនេរ ហើយជាទីតាំងអំណោយផល ដល់ការប្រកបមុខជំនួញផងដែរនោះ បានធ្វើឱ្យតម្លៃអចលនទ្រព្យមានការកើនឡើងជារៀងរាល់ឆ្នាំ”។

អ្នកជំនាញផ្នែកវាយតម្លៃអចលនទ្រព្យ និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា រូបនេះបានបន្តឱ្យដឹងទៀតថា តម្លៃអចលនទ្រព្យដែលស្ថិតនៅតាមបណ្តោយមហាវិថីមួយនេះ គឺមិនស្មើគ្នានោះទេ ដែលវាក៏អាស្រ័យទៅតាំមទីតាំង តំបន់ ជាពិសេសគឺទំហំនិងប្រវែង។ ចំពោះផ្ទះល្វែងខ្លះដែលមានប្រវែងខ្លី និងមានជាន់តិច អាចលក់ក្នុងចន្លោះក្រោមមួយលាន ប៉ុន្តែផ្ទះខ្លះមានប្រវែង(Eo, E1, E2) អាចលក់បានជាង១លានដុល្លារឬអាចលើសពីនេះ ប្រសិនបើជាប្រភេទលំនៅដ្ឋានដែលមានម្ចា​ស់ច្រើនគ្នា។

យ៉ាងណាក៏ដោយ លោកស្រីតាំង ហួរ ក៏បានបញ្ជាក់ផងដែរថា ចំពោះតម្លៃទាំងនេះ នៅមិនទាន់ឈានដល់ចំណុចកំពូលនៅឡើយនោះទេ ដែលវានៅមានឱកាសឡើងខ្ពស់ជាងនេះបន្តិចទៀតនៅឆ្នាំបន្ទាប់។

លើកឡើងស្រដៀងគ្នានេះ លោក វ៉ា វីរៈ នាយកក្រុមហ៊ុនអចលនទ្រព្យលំដាប់អន្តរជាតិ Century21 Fortuna Investment បានមានប្រសាសន៍ឱ្យដឹងផងដែរថា មហាវិថីព្រះសីហនុ គឺត្រូវបានបែងចែកចេញតំបន់ផ្សេងគ្នា ដូចជាចាប់ពីចំណុចស្តុបមន្ទីរពេទ្យចិន (ស្តុបអាគារ៤២ជាន់) រហូតមកដល់ចំណុចម្ដុំរង្វង់មូលវិមានឯករាជ្យ ដែលស្ថិតនៅក្នុងសង្កាត់បឹងកេង គឺមានតម្លៃថ្លៃ ហើយទីតាំងខ្លះអាចថ្លៃលើសតម្លៃដី ដែលស្ថិតនៅក្នុងសង្កាត់បឹងកេងកង១(ផ្លូវខាងក្នុង) ថែមទៀតផង ដោយសារតែវាស្ថិតនៅលើមហាវិថី ដែលអាចក្នុងតម្លៃជាង៦,០០០ដុល្លារឡើងទៅក្នុងមួយម៉ែត្រការ៉េ។

ដោយឡែកចាប់ពីចំណុចខាងក្រោយវិទ្យាល័យព្រះយុគន្ធរ រហូតដល់ចំណុចស្តុបវត្តមហាមន្ត្រី ដែលស្ថិតនៅក្នុងសង្កាត់បឹងព្រលឹត ខណ្ឌ៧មករា អាចមានតម្លៃទាបអាចក្នុងចន្លោះ៤,៥០០ទៅ៥,០០០ដុល្លារក្នុងមួយម៉ែត្រការ៉េ ព្រោះនៅតំបន់នេះភាគច្រើនលំនៅដ្ឋាន ដែលមានអាជីវកម្មលក្ខណៈគ្រួសារច្រើន។ ប៉ុន្តែចាប់ពីស្តុបវត្តមហាមន្ត្រីរហូតដល់តំបន់ស្តុបអាងទឹកអូរឡាំពិក ដែលស្ថិតក្នុងសង្កាត់អូរឡាំពិក អាចមានតម្លៃថ្លៃបន្តិចឡើងវិញ៕

ភ្នំពេញ៖ វិស័យសំណង់និងហេដ្ឋារចនាសម្ព័ន្ធនៅក្នុងប្រទេសកម្ពុជានឹងកើនឡើងប្រមាណ ៦% នៅក្នុងឆ្នាំ ២០២០។ នេះបើតាមការព្យាករណ៍របស់អត្រាកំណើនប្រចាំឆ្នាំសកលលោក (CAGR) កាលពីថ្ងៃទី ១២ មីនា ឆ្នាំ ២០២០។

កម្ពុជាកំពុងទទួលបានការវិនិយោគជាច្រើនជាមួយនឹងការអភិវឌ្ឍហេដ្ឋារចនាសម្ព័ន្ធ ថាមពល និងបរិស្ថាន ដើម្បីជម្រុញតម្រូវការទីផ្សាររបស់ក្រុមហ៊ុនសំណង់និងហេដ្ឋារចនាសម្ព័ន្ធនៅកម្ពុជា។
ប្រទេសកម្ពុជាទាក់ទាញការវិនិយោគលើហេដ្ឋារចនាម្ព័ន្ធជាច្រើនដូចជា ផ្លូវថ្នល់ ផ្លូវដែក កំពង់ផែ ការបញ្ជូនថាមពលនិងទឹក។

បើតាមឱ្យដឹងពីប្រធានមជ្ឈមណ្ឌលសិក្សាគោលនយោបាយ លោក ច័ន្ទ សុផល បានថ្លែងប្រាប់សារព័ត៌មានក្នុងស្រុកថា គម្រោងហេដ្ឋារចនាសម្ព័ន្ធប្រចាំឆ្នាំរបស់រដ្ឋាភិបាលបានចំណាយថវិកាអស់ប្រហែល ៤០០លានដុល្លារ ដោយក្នុងនោះមានរួមបញ្ចូលទាំងការថែរក្សាផ្លូវតាមបណ្តារខេត្ត និងការកសាងប្រឡាយនានាជាដើម។

ទោះបីជាមានការព្យាករណ៍ថាកើនឡើងមែនពិត ប៉ុន្តែបើតាមការថ្លែងសុន្ទរកថារបស់សម្តេចតេជោកាលពីពេលថ្មីៗនេះថា រាល់គម្រោងសាងសង់ដែលជាថវិការរបស់រដ្ឋាភិបាលកម្ពុជាដែលមិនទាន់បើកការដ្ឋាននោះត្រូវពន្យាពេលការបើកការដ្ឋាន លើកលែងតែគម្រោងវិនិយោគហិរញ្ញប្បទានពីបរទេសតែប៉ុណ្ណោះ។

គិតមកត្រឹមខែមីនា ឆ្នាំ ២០២០នេះ កម្ពុជាបានការវិនិយោគនិងជំនួយជាច្រើនពីសំណាក់បរទេសក្នុងចំនួនទឹកប្រាក់រាប់ពាន់លានដុល្លារហើយកាលពីថ្មីៗនេះទើបតែសម្ពោធនិងបើកការដ្ឋានហេដ្ឋារចនាសម្ព័ន្ធផ្លូវថ្នល់ដូចជា ការសម្ពោធដាក់ឱ្យប្រើប្រាស់ផ្លូវជាតិ៥៥ និងការបើកការដ្ឋានសាងសង់ផ្លូវជាតិលេខ ១០ និងហេដ្ឋារចនាសម្ព័ន្ធដទៃទៀតផងដែរ៕