នៅដើមឆ្នាំថ្មី ២០២៣  ប្រហែលមានបងប្អូនប្រជាពលរដ្ឋ ក៏ដូចជាវិនិយោគិនជាច្រើន កំពុងស្វែងរក អចលនទ្រព្យណាដែលវិនិយោគទៅឆាប់ឃើញផលចំណេញ។ យ៉ាងណាឆ្នាំ២០២៣ នេះគឺជាឆ្នាំដ៏ល្អមួយសម្រាប់ការវិនិយោគលើអលចនទ្រព្យ ក៏នៅមានតម្លៃល្អខ្លាំងនៅក្នុងទីផ្សារបច្ចុប្បន្ន ល្អសម្រាប់ការវិនិយោគ ។

ទាក់ទងនិងការវិនិយោគខាងលើនេះផងដែរអ្នកជំនាញអចលនទ្រព្យលោក ​ គង់ គីមសេង  នាយកផ្នែកលក់ និងទីផ្សារ ប្រចាំក្រុមហ៊ុន Making Property Easy Co., Ltd បានប្រាប់ Business Cambodia យ៉ាងដូច្នេះថា ចំពោះ អចលនទ្រព្យដែលដាក់ជួលហើយទទួលផលចំណេញបានលឿនមានដូចជា៖ ដីអាជីវកម្ម ខុនដូ និង ផ្ទះអាជីវកម្ម ជាដើម។

លោក គង់ គីមសេង បានបន្តថាចំពោះអលនទ្រព្យដែលឆាប់ទទួលបានផលចំណេញវិញគឺជាការទិញហើយដាក់ជួល  ដោយក្នុងនោះរួមមាន៖​

១. ដីអាជីវកម្ម

សម្រាប់ដីមួយប្រភេទនេះ គឺស្ថិតនៅជុំវិញក្រុង ដែលមាននៅក្នុងក្រុង តំបន់ជាយក្រុង និងទីប្រជុំជន ។ ដីប្រភេទនេះជាដីលំដាប់លេខ១ដោយហេតុថាមានតម្រូវការខ្ពស់ និងអាចបំពេញអោយតម្រូវការជាទីតាំងអាជីវកម្មនាពេលអនាគតដូចជាភោជនីយដ្ឋាន ហាងកាហ្វេ យានដ្ឋានជួសជុលរថយន្ត កន្លែងដាក់តាំងលក់ផលិតផល (showroom) ហាងទំនិញ និងឃ្លាំងជាដើម។ ចំណុចគួរកត់សម្គាល់ ទីតាំងដីប្រភេទនេះមិនត្រឹមតែមានតម្រូវការខ្ពស់នោះទេ ផ្ទុយទៅវិញមានការផ្គត់ផ្គង់ទាបនៅឡើយបើប្រៀបធៀបទីតាំងសំរាប់ការសាងសង់ជាលំនៅឋាន។

២.ខុនដូ

ចំពោះខុនដូវិញលោក គង់ គីមសេង បានបញ្ជាក់ថា​ខុនដូ គឺមិនចាំបាច់ចំណាយលុយច្រើនដូចដី ឬក៏ផ្ទះអាជីវកម្មនោះទេ។ ដោយលោកអ្នកអាចអាចប្រើប្រាស់កញ្ចប់ថវិកាចាប់ពីខ្ទង់ ៦x,xxx ដុល្លារ ជាងឡើងទៅ និងវិនិយោគលើគម្រោងខុនដូដែលសាងសង់រួចរាល់១០០ភាគរយក៏អាចដាក់ជួលបានភ្លាមៗផងដែរ។  ហើយចំពោះការដាក់ជួលវិញគឺអាចជួលបានពីចន្លោះ ៥០០ដុល្លារ ទៅ២,៥០០/ខែរយដុល្លារ ទៅតាមតំបន់ ប្រភេទខុនដូ និងទំហំបន្ទប់។ ជាក់ស្ដែងដូចជាតំបន់បឹងកេងកងជាដើម។

៣. ផ្ទះអាជីវកម្ម

ត្រង់ចំណុចនេះលោកបានឱ្យដឹងថា សម្រាប់អចលនទ្រព្យប្រភេទនេះលោកអ្នកគួរតែទិញតំបន់ណាដែលមានសក្កានុពល។ ដោយសារពេលដែលលោកអ្នកទិញទៅអាចដាក់ជួលឆាប់ចេញ ប៉ុន្តែទាំងដីនិងផ្ទះអាជីវកម្មគឺ អាចប្រើដើមទុនរាងច្រើនបន្តិច ព្រោះថារាល់ទីតាំងនីមួយៗត្រូវតែជាទីតាំងល្អ ដូច្នេះតម្លៃក៏ទៅតាំងនិងដែរ។

លោក គង់​ គីមសេង ក៏បានផ្ញើសារទៅកាន់អ្នកវិនិយោគយ៉ាងដូច្នេះថា​ “ខ្ញុំចង់ឱ្យវិនិយោគិនទាំងអស់ គិតទៅលើគោលបំណងឱ្យច្បាស់លាស់ មុននិងសម្រេចចិត្តវិនិយោគ ដោយសួរខ្លួនឯងថា ហេតុអ្វីបានជាត្រូវវិនិយោគ? នេះជាសំនួរដ៏សំខាន់មួយ ដែលវិនិយោគិនគ្រប់រូបត្រូវសួរខ្លួនឯង” ។

លោកបន្តទៀតថា ដើម្បីមានភាពងាយស្រួល មានទំនុកចិត្ត និងសុវត្តិភាពលើការវិនិយោគ វិនិយោគិនគួរតែស្វែងរក អ្នកជំនាញ ឬក្រុមហ៊ុនភ្នាក់ងារអចលនទ្រព្យវិជ្ជាជីវៈ ដើម្បីទទួលបានការប្រឹក្សាយោបល់ដ៏ត្រឹមត្រូវមុនសម្រេចចិត្តវិនិយោគ ។

ប្រភពពី៖ Business Cambodia

ពិតណាស់ការវិនិយោគមិនប្រាកដថាទាល់តែមានលុយរាប់ម៉ឺនទើបអាចចាប់ផ្ដើមបាននោះទេ។ ជួនកាលលោកអ្នកអាចប្រើប្រាស់ដើមទុនតិចក៏អាចធ្វើបាន ប៉ុន្តែអាស្រ័យថាតើលោកអ្នកចេះប្រើលុយនោះដោយរបៀបណា ប្រសិនបើប្រើប្រាស់លុយត្រូវចាត់ទុកថាសំណាង  តែបើដើមទុនតិចហើយប្រើប្រាស់លុយខុសទៀតប្រាកដជាយ៉ាប់មិនខាន។

១. កុំប្រើលុយឱ្យលើសកំណត់

មែនទែនទៅប្រសិនបើមានដើមទុនតិចវារៀងពិបាកបន្តិចក្នុងការចំណាញផ្សេងៗទៅលើការវិនិយោគ ដោយសាខ្វះមុខខ្វះក្រោយ អ៊ីចឹងទាមទារឱ្យលោកអ្នកត្រូវតែគិតឱ្យបាន៣ ដងមុននិងសម្រេចចិត្តធ្វើអ្វីមួយ។ ដូ​ច្នេះប្រសិនបើប្រើប្រាស់លុយត្រឹមត្រូវចាត់ទុកថា ជារឿងល្អ តែបើខុសគឺពិបាកបន្តិចហើយ។

២. វិនិយោគអចលនទ្រព្យដែលបានតម្លៃត្រឡប់មកវិញ

ដើម្បីទទួលបានផលចំណេញលោកអ្នកគួរតែ វិនិយោគអចលនទ្រព្យណាដែលអាចបានតម្លៃត្រឡប់មកវិញ ហើយចំពោះអចលនទ្រព្យដែលអាចទទួលបានផលចំណេញគឺបានមកពីការដាក់ជួលនេះឯង។ ត្រង់ចំណុចនេះលោក ច្រឹក សុខនីម បានឱ្យដឹងថា អចលនទ្រព្យដែលដាក់ជួលហើយឆាប់ទទួលបានផលចំណេញគឺ ខុនដូ និងផ្ទះ៕

ប្រភពពី៖ Business Cambodia

ភ្នំពេញ ៖ ដើមឆ្នាំ២០២៣នេះ កម្ពុជាហាក់មានសញ្ញាវិជ្ជមានច្រើនពីគម្រោងវិនិយោគថ្មីៗ ដែលអាចឱ្យកម្ពុជាស្ដារនិងជំរុញសេដ្ឋកិច្ចបានលឿនរហ័ស។ ជាក់ស្ដែង ត្រឹមតែរយៈពេលប៉ុន្មានថ្ងៃប៉ុណ្ណោះ កម្ពុជាបានប្រកាសពីគម្រោងវិនិយោគធំៗទាំងរដ្ឋនិងឯកជន។

កាលពីពេលថ្មីៗនេះ គម្រោងព្រលានយន្តហោះអន្តរជាតិនៅក្រុងកោះរ៉ុង ខេត្តព្រះសីហនុបានប្រកាសទទួលស្គាល់ ដោយលេខាធិការដ្ឋានអាកាសចរស៊ីវិល ដែលមានទំហំទឹកប្រាក់វិនិយោគជាង៣០០លានដុល្លារអាមេរិក វិនិយោគដោយក្រុមហ៊ុនឯកជនក្នុងស្រុក។

ក្រោយមក កម្ពុជាក៏បានប្រកាសពីគម្រោងជាប្រវត្តិសាស្ត្រ គឺផ្លូវរថភ្លើងល្បឿនលឿនពីភ្នំពេញទៅប៉ោយប៉ែត ដែលមានតម្លៃ វិនិយោគប្រមាណ៤ពាន់លានដុល្លារអាមេរិក។ គម្រោងនេះបានសិក្សាដោយក្រុមហ៊ុនស្ពានថ្នល់ របស់ចិន ដែលជាសញ្ញាវិជ្ជមានកាន់តែខ្ពស់ ចំពោះស្ថានភាពនៃការវិនិយោគទាំងរដ្ឋ និងឯកជន។

ការកត់សម្គាល់ នៅព្រឹកថ្ងៃទី២៧ មករា ២០២៣នេះ ទេសចរ និងវិនិយោគិនចិនប្រមាណ១០០នាក់បានមកដល់កម្ពុជាតាមជើងយន្តហោះពីទីក្រុងគុនមិញ ប្រទេសចិនចុះចតនៅខេត្តព្រះសីហនុ ហើយក៏មានការស្វាគមន៍ពីរដ្ឋបាលខេត្តព្រះសីហនុយ៉ាងរាក់ទាក់ផងដែរ។ នេះជាសកម្មភាពដែលបង្ហាញពីសញ្ញាណល្អ សម្រាប់ឆ្នាំ២០២៣នេះ និងអាចជាការត្រួសត្រាយផ្លូវទៅរកភាពល្អប្រសើរកាន់តែខ្លាំងនៅឆ្នាំនេះ និងឆ្នាំក្រោយ។

លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាល នៃសមាគមអ្នកជំនាញអចលនទ្រព្យកម្ពុជាបានលើកឡើងថា ស្ថានភាពអចលនទ្រព្យនៅកម្ពុជាអាចនឹងវិលទៅរកភាពប្រក្រតីដូចមុនកូវីដ១៩វិញ ជាបន្តបន្ទាប់ យ៉ាងយូរនៅចុងឆ្នាំនេះ ឬដើមឆ្នាំក្រោយ។

លោកឧកញ៉ាបានមានប្រសាសន៍ថា ជាការកត់សម្គាល់ បានឃើញថា នៅពេលមានគម្រោងវិនិយោគរដ្ឋធំៗណាមួយនៅបានប្រកាស ឬចាប់ផ្ដើមអភិវឌ្ឍន៍បានធ្វើឱ្យតម្លៃដីធ្លី និងអចលនទ្រព្យ នៅតំបន់នោះមានសន្ទុះមួយកម្រិត ហើយក៏ជាការចាប់អារម្មណ៍របស់វិនិយោគិនផ្នែកអចលនទ្រព្យផងដែរ។

លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា ក៏បានថ្លែងកាលពីពេលថ្មីៗនេះថា ភាពសំបូរបែបនៃហេដ្ឋារចនាសម្ព័ន្ធ នៅក្នុងប្រទេសកម្ពុជា គឺជាកត្តាជំរុញកំណើនសេដ្ឋកិច្ចបានមួយកម្រិតទៀត  ដោយអាចធ្វើឱ្យការដឹកជញ្ជូនក្នុងប្រទេសកម្ពុជា មានការប្រកួតប្រជែង ជាមួយប្រទេសជិតខាង។

អ្នកវិនិយោគក្នុងស្រុក និងអាជីវករជាច្រើនទៀត បានបង្ហាញក្តីរំពឹងខ្ពស់ថាឆ្នាំនេះ គឺជាឆ្នាំល្អរបស់ពួកគេ ដើម្បីប្រមូលយកនូវអ្វី ដែលបាត់បង់វិញ ទាំងវិស័យទេសចរ និងការវិនិយោគថ្មីៗ។ ពួកគេបានរំពឹងខ្ពស់ទៅលើវត្តមានទេសចរ និងវិនិយោគិនចិនចូលមកកម្ពុជា ក្រោយពីរដ្ឋាភិបាលចិនបានប្រកាសបើកប្រទេសបើកទូលាយឱ្យពលរដ្ឋចិនធ្វើដំណើរចេញក្រៅប្រទេស ហើយក៏រំពឹងថាចិននឹងសប្បាយចាយវាយលុយ ដែលពួកគេខកខាន អស់រយៈពេល៣ឆ្នាំកន្លង៕

ប្រភពពី​៖ Property Area

ជាទូទៅនៅពេលដែលអ្នកចង់លក់ផ្ទះគឺតែងតែចង់ឱ្យលក់ឆាប់ហើយបានតម្លៃខ្ពស់ តែលោកអ្នកដឹងថារាល់អតិថិជនដែលចង់ទិញផ្ទះរបស់លោកអ្នក គឺពិចារណាច្រើនចំណុចទាក់ទងនិងតម្លៃ គុណភាពសំណង់ ឬទីតាំងជាដើម ក៏ដូចជារចនាបទនានាដែលមាននៅក្នុងផ្ទះផងដែរ។​​ ដូច្នេះត្រូវទាមទារឱ្យអ្នកត្រូវមាន​សិល្បៈ និងសិល្បវិធី​ជាច្រើន​ដើម្បីទាក់ចិត្តអតិថិជន​ឱ្យសម្រេចចិត្តទិញបាន។

ភ្នំពេញ ៖ ក្នុងឆ្នាំ២០២២កន្លងទៅ សេដ្ឋកិច្ចកម្ពុជាមានកំណើនប្រមាណ៥,៥ភាគរយ ដែលគាំទ្រដោយវិស័យមួយចំនួន ជាពិសេសសកម្មភាពនៃការវិនិយោគក៏ហាក់មានសញ្ញាប្រសើរបន្តិចដែរ។ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងក្នុងកិច្ចសម្ភាសន៍មួយថា ឆ្នាំ២០២៣នេះ កម្ពុជាគឺជាគោលដៅវិនិយោគដ៏សំខាន់មួយរបស់វិនិយោគិនបរទេស។

លោកឧកញ៉ាបានមានប្រសាសន៍ថា កម្ពុជាជាប្រទេសមួយកំពុងមានការទាក់ទាញអ្នកវិនិយោគនានា ដោយកម្ពុជាបានបើកទូលាយ ដល់បណ្ដាវិនិយោគិន មកពីគ្រប់ទិសទី។ ជាក់ស្ដែង នៅក្នុងវិបត្តិដែលពិភពលោកមានការព្រួយបារម្ភ និងការវិនិយោគ នៅប្រទេសនានា លើពិភពលោក កំពុងមានសភាពស្ងប់ស្ងាត់នោះ ក៏កម្ពុជានៅតែទទួលបានការវិនិយោគជាបន្តបន្ទាប់ ទាំងការវិនិយោគមកពីខាងក្រៅប្រទេស និងការវិនិយោគ ពីសំណាក់អ្នកក្នុងប្រទេសកម្ពុជា។

លោកឧកញ៉ាបន្តថា បច្ចុប្បន្ន កម្ពុជាទទួលបានការវិនិយោគលើផ្នែកជាច្រើន ដូចជា រោងចក្រឧស្សាហកម្មតូចធំ សហគ្រាសក្នុងស្រុក ផ្សារទំនើបធំៗ និងបានបើកដំណើរការ ជាបន្តបន្ទាប់ផងដែរ។ ទាំងនេះវាបានបង្ហាញពីការងើបឡើងវិញជាបន្តបន្ទាប់ និងបន្តទាក់ទាញការវិនិយោគ ជាហូរហែរបន្ថែមទៀត នៅក្រោយវិបត្តិកូវីដ១៩ ហើយឆ្នាំ២០២៣នេះ ក៏រំពឹងថា កម្ពុជានឹងទទួលបានការវិនិយោគបន្ថែម ពីក្នុង និងក្រៅប្រទេសផងដែរ។

លោក វ៉ាង វិនធាន ឯកអគ្គរដ្ឋទូតនៃសាធារណរដ្ឋប្រជាមានិតចិន បានថ្លែងកាលពីថ្ងៃទី២ មករា ២០២៣កន្លងទៅនេះថា កម្ពុជាជាគោលដៅសំខាន់បំផុតរបស់ប្រជាជនចិន ទាំងទេសចរ និងវិនិយោគិន។ នៅពេលប្រទេសចិនបើកប្រទេសបើកទូលាយ ឱ្យប្រជាជនចេញក្រៅប្រទេស ពេលនោះប្រជាជនចិននឹងចូលមកកម្ពុជាចំនួនច្រើន។

តាមការចុះផ្សាយរបស់បណ្ដាញសារព័ត៌មានចិនមួយ បានបង្ហាញថា នៅមុនពេលចិនបើកប្រទេសជាផ្លូវការនោះ មានប្រជាជនប្រមាណ១០០លាននាក់ហើយ បានដាក់ពាក្យស្នើសុំចេញក្រៅប្រទេស ពីព្រោះតែពួកគេមិនបានចេញក្រៅប្រទេស ជាយូរមកហើយ ដោយសារតែស្ថានភាពកូវីដ១៩ក្នុងប្រទេសចិន។ កម្ពុជាក៏ជាគោលដៅនៃប្រជាជនជាង១០០លាននាក់នោះផងដែរ ដែលនឹងអាចធ្វើឱ្យសេដ្ឋកិច្ចកម្ពុជា នឹងមានកំណើនមួយកម្រិតទៀត៕

ប្រភពពី៖ Property News

ការវិនិយោគបែបណាក៏ដោយគឺទាមទារឲ្យអ្នកទិញត្រូវមានភាពច្បាស់លាស់ និងធ្វើការសម្រេចចិត្តវិនិយោគជាមួយអចលនទ្រ​ព្យដ៏ត្រឹមត្រូវមួយ។ ប៉ុន្តែប្រសិនបើអ្នកវិនិយោគខុសគោលដៅ អ្នកមិនមែនត្រឹមតែខាតបង់ប្រាក់ប៉ុណ្ណោះទេប៉ុន្តែថែមទាំងពេលវេលា និងកម្លាំងកាយចិត្តផងដែរ។ ដូច្នេះតើអ្នកត្រូវយល់ដឹងអ្វីខ្លះ អំពីការវិនិយោគ ដែលចាត់ទុកថាជាវិនិយោគដែលអាចធានាបានផលចំណេញ?

យោងតាមការដកស្រងចេញពីសារព័ត៌មាន Modest Money បានបង្ហាញពីគន្លឹះ ៥យ៉ាងជាមុនសិនប្រសិនបើចង់ទទួលបានផលចំណេញពីការវិនិយោគ៖

ភ្នំពេញ៖ ក្នុងការវិនិយោគអចលនទ្រព្យ អ្នកបោះទុនចំណាយតែងតែរំពឹងពីចំណូលត្រលប់មកវិញ ដោយប្រើប្រាស់វិធីសាស្ត្រខុសៗគ្នា។ អ្នកជំនាញអចលនទ្រព្យបង្ហើបពីវិធីសាស្ត្រ និងក្បួនបង្កើនតម្លៃអចលនទ្រព្យ និងការទទួលបានចំណូលពីការវិនិយោគ។

លោក វ៉ា វីរៈ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Fortuna Investment បានមានប្រសាសន៍ថា អ្នកវិនិយោគអាចទទួលបានចំណូលពីការវិនិយោគអចលនទ្រព្យតាមរយៈ៤វិធីដូចខាងក្រោម៖

ទី១. កា​រឡើង​ថ្លៃ​នៃតម្លៃអចលនទ្រព្យ​នៅលើទីផ្សារ ៖ ចំណុចនេះគឺសំដៅ​ដល់ការទិញ​អចលនទ្រព្យ​ទុក​ដើម្បី​វិនិយោគបន្ត ឬសម្រាប់លក់យកចំណេញវិញ​ពេលវា​ឡើងថ្លៃ ខណៈដែល​ការកើន​ឡើង​នៃតម្លៃអចលនទ្រព្យ​តិច ឬច្រើន គឺអាស្រ័យទាក់ទង​ទៅនឹ​ងតម្រូវការទីផ្សារជាក់ស្ដែង ពី​ព្រោះថា​នៅពេល​អចលនទ្រព្យ​​មានតម្រូវកា​រកាន់តែខ្ពស់ តម្លៃអចលនទ្រព្យ​ក៏នឹងកើនឡើង​កាន់តែខ្ពស់​ផង​ដែរ។

ទី២. កា​របង្កើត​ចំណូលអចលនទ្រព្យប្រចាំខែ៖ សំដៅ​ដល់ការទិញអចលនទ្រព្យសម្រាប់វិនិយោគដោយការជួល​យក​កម្រៃ​ជា​ប្រចាំខែ ឬប្រចាំឆ្នាំ ដូចជា​ការ​ទិញដី ឃ្លាំង ឬទិញផ្ទះនៅជាប់ផ្លូវធំដែលអាចបើកអាជីវកម្ម​បាន ​ហើយជួលឱ្យ​អ្នក​ដែល​ចង់បើកអាជីវកម្ម និ​ងទទួលបានប្រាក់ឈ្នួល​ប្រចាំខែត្រឡប់មកវិញ ។

ទី៣. ​ការ​បូក​បញ្ចូលគ្នារវាង​របៀបទី​១ និងរបៀបទី​២៖ នៅក្នុងចំណុចនេះ គេអាចបន្តអនុវត្តរបៀបទី២ ដោយការជួលយកកម្រៃប្រចាំខែ ឬឆ្នាំ ហើយនៅពេល​ដែល​មានតម្រូវការទីផ្សារខ្ពស់ តម្លៃចាប់ផ្តើមឡើងថ្លៃខ្លាំង គេក៏អាចសម្រេចចិត្តលក់យកចំណេញទាំងដុលតែម្ដង។ របៀបទី៣នេះត្រូវបានគេនិយមអនុវត្ត​ច្រើន​ជាងគេ។

ទី​៤. ការបង្កើត​ចំណូលពីការ​វិនិយោគអចលនទ្រព្យដោយខ្លួនឯងផ្ទាល់៖​ ចំណុចនេះ អ្នកវិនិយោគខ្លួនឯងដោយផ្ទាល់អាច​ទិញអចលនទ្រព្យយកមកប្រើជា​ប្រយោជន៍​ជាក់ស្ដែង ដោយការបង្កើតជាទីតាំងអាជីវកម្ម ឬអភិវឌ្ឍជាលំនៅដ្ឋានជួលដែលអាច​រកចំណូល​ប្រចាំថ្ងៃ ​ប្រចាំខែ ឬក៏​ទិញ​ដី​ដែលមានទីតាំ​ងល្អ​សម្រាប់​​បើក​មុខរបរ​អាជីវកម្មខ្លួនឯងតែម្ដង ព្រោះនៅពេលដែលតំបន់មួយមានមនុស្សរស់នៅ មានសកម្មភាពអាជីវកម្ម នោះតម្លៃដីធ្លីក៏ឡើងដូចគ្នា៕

ប្រភពពី៖ Property Area

ភ្នំពេញៈ ការវិនិយោគនៅក្នុងតំបន់សក្តានុពលផ្សេងគ្នា ក៏នឹងផ្តល់មកវិញនូវផលចំណេញ ក្នុងកម្រិតផ្សេងគ្នាផងដែរ។ អ្នកជំនាញនៃទីផ្សារអចលនទ្រព្យបានលើកឡើងពី ប្រភេទនៃការវិនិយោគចំនួនបីប្រភេទខុសគ្នា នៅលើទីតាំងខុសៗគ្នា ដែលផ្តល់នូវផលចំណេញ និងប្រឈមនឹងកម្រិតហានិភ័យក្នុងកម្រិតខុសៗគ្នា។

លោក សន សៀប ស្ថាបនិក និងជាប្រធានក្រុមហ៊ុនអចលនទ្រព្យ Key Real Estate បានមានប្រសាសន៍ឲ្យដឹងកាលពីចុងសប្តាហ៍មុននេះថា សម្រាប់ការវិនិយោគ ត្រូវបានបែងចែកចេញជា៣ប្រភេទ រួមមាន ការវិនិយោគ ដែលមានហានិភ័យទាប មានហានិភ័យមធ្យម និងមានហានិភ័យខ្ពស់។ ប្រភេទការវិនិយោគនីមួយៗ ត្រូវបានផ្តោតនៅក្នុងទីតាំង និងអាចផ្តល់នូវផលចំណេញត្រលប់មកវិញខុសៗគ្នា។

បើយោងតាមលោកសន សៀប ប្រភេទនៃការវិនិយោគទី១ ដែលមានហានិភ័យទាប ជាប្រភេទនៃការវិនិយោគ នៅក្នុងតំបន់ដែលត្រូវបានអភិវឌ្ឍន៍រួចរាល់ហើយ រួមមាន ការវិនិយោគខុនដូ ដីធ្លី លំនៅឋាន នៅក្នុងរាជធានីនៅភ្នំពេញ ជាដើម។ តាមការប៉ានស្មាន ជាមធ្យម អត្រាផលចំណេញពីការវិនិយោគ (Return On Investment ) ក្នុងប្រភេទទី១នេះ មានចន្លោះពី៥ទៅ១០ភាគរយ។

ការវិនិយោគប្រភេទនេះ ស័ក្តិសមសម្រាប់អតិថិជន ឬវិនិយោគិនទាំងឡាយណា ដែលមិនចូលចិត្តការប្រថុយប្រថាន។

ប្រភេទនៃការវិនិយោគទី២ ដែលមានហានិភ័យមធ្យម ស័ក្តិសមសម្រាប់ក្រុមអ្នកវិនិយោគ ដែលមានហានិភ័យមធ្យម មានទីតាំងនៅក្នុងតំបន់ ដែលកំពុងតែអភិវឌ្ឍន៍ ដូចជា ផ្លូវក្រវាត់ក្រុងទី៣ និងទី៤ តំបន់ជាយរាជធានីភ្នំពេញមួយចំនួន។ ជាទូទៅ ការវិនិយោគប្រភេទនេះអាចផ្តល់ផលចំណេញពីការវិនិយោគ (RO I) ចន្លោះពី១៥ទៅ៣០ភាគរយ។

ចំណែក ប្រភេទនៃការវិនិយោគទី៣ ដែលមានហានិភ័យខ្ពស់ គួរជ្រើសរើសវិនិយោគ នៅក្នុងតំបន់អភិវឌ្ឍន៍នាពេលអនាគត ហើយអាចផ្តល់ផលចំណេញពីការវិនិយោគ ចន្លោះពី៣០ ទៅ៥០ភាគរយ។

ជាមួយគ្នានេះផងដែរ លោកឧកញ៉ាបណ្ឌិត គីម ហ៊ាង ប្រធាន KW Cambodia បានចែករំលែកបទពិសោធន៍ថា ប្រសិនបើចង់ទិញដីធ្លី ទទួលបានផលចំណេញខ្ពស់ អ្នកវិនិយោគត្រូវសម្លឹងមើលលើប្រភេទដី និងពិចា​រណា លើរយៈពេលនៃការវិនិយោគរបស់ខ្លួន ថាចង់វិនិយោគរយៈពេលខ្លី មធ្យម ឬវែង។

អ្នកជំនាញជើងចាស់រូបនេះ បានផ្តល់យោបល់ថា សម្រាប់វិនិយោគរយៈពេលខ្លី ដែលអាចទទួលផលចំណេញ ក្នុងរយៈពេល១ទៅ២ឆ្នាំ គួរទិញដីនៅក្នុងតំបន់កណ្តាលក្រុង ឬជាយក្រុងមួយចំនួន។ សម្រាប់វិនិយោគរយៈពេលមធ្យម ដែលអាចទទួលផលចំណេញ ក្នុងរយៈពេល៣ទៅ៥ឆ្នាំ គួរទិញដីនៅក្នុងតំបន់ទាំងឡាយណា ក្នុងរយៈចម្ងាយ៣០គីឡូម៉ែត្រជុំវិញរាជធានីភ្នំពេញ ដែលមានដង់ស៊ីតេប្រជាជនខ្ពស់ និងចរន្តសេដ្ឋកិច្ចខ្លាំង៕

ប្រភពពី៖ Property Area

ភ្នំពេញ៖ ដើម្បីស្តារសេដ្ឋកិច្ចរបស់ខ្លួនឡើងវិញពីវិបត្តិជំងឺកូវីដ១៩ និង​វិបត្តិសេដ្ឋកិច្ច ប្រទេសនីមួយៗបានព្យាយាមដណ្តើមចំណែកទីផ្សារ និងការវិនិយោគពីសំណាក់បណ្តាវិនិយោគបរទេសនានា។ ក្នុងនោះ ប្រទេសកម្ពុជាក៏បានព្យាយាមពង្រឹងសមត្ថភាព និង​ទាក់ទាញវិនិយោគិនផងដែរ។

លោក ​ច្រឹក សុខនីម ​ប្រធាន​សមាគម​អ្នកវាយតម្លៃ និ​ងភ្នាក់ងារ​អចលនវត្ថុ បានមានប្រសាសន៍តាមប្រព័ន្ធទូរស័ព្ទ នៅថ្ងៃទី២២ ខែកក្កដាកន្លងមកថា ការវិនិយោគលើអចលនទ្រព្យនៅក្នុងប្រទេសកម្ពុជា នាពេលបច្ចុប្បន្នជាសញ្ញានៃភាពរីកចម្រើនមួយ ពោលគឺផលចំណូលពីការវិនិយោគលើវិស័យអចលនទ្រព្យនៅកម្ពុជាមានចំណូលខ្ពស់ បើប្រៀបធៀបទៅនឹងប្រទេសជិតខាងនៅក្នុងតំបន់។

លោកបានមានប្រសាសន៍ទៀតថា “យ៉ាងណាក្តី ប្រទេសនានា នៅក្នុងតំបន់ក៏បាននិងកំពុងចាប់ផ្ដើមទាក់ទាញអ្នកវិនិយោគមកកាន់ប្រទេសរបស់ខ្លួនដែរ ដូចជាប្រទេសថៃ បានព្យាយាមលើកកម្ពស់អ្នកវិនិយោគច្រើន ដើម្បីគាំទ្រ និងការពារគម្រោងរបស់ពួកគេ”។

ដោយឡែក សម្រាប់ប្រទេសកម្ពុជា លោក សុខនីម លើកឡើងថា កម្ពុជាក៏មានយន្តការគ្រប់គ្រប់ក្នុងការគាំទ្រ និងការពារផងដែរ ដូចជា ការផ្តល់សញ្ជាតិដល់វិនិយោគិនបរទេស ច្បាប់វិនិយោគថ្មី ដែលត្រូវបានបង្គើតមកពិសេសសម្រាប់ការទាក់ទាញជនជាតិបរទេស មក​វិនិយោគនៅក្នុងប្រទេសកម្ពុជា។

លោកបន្តទៀតថា ការប្រកួតប្រជែងនេះអាស្រ័យលើការជ្រើសរើសរបស់អតិថិជន ដែលអាស្រ័យលើគោលបំណងនៃការវិនិយោគ របស់ពួកគាត់ ថាតើគាត់ចង់វិនិយោគ ដើម្បីទាក់ទាញក្នុងវិស័យណាមួយ។

លោកបានគូសបញ្ជាក់ថា “ភាពបត់បែនរបស់ប្រទេសកម្ពុជាយើង ធៀបនឹងបណ្ដាប្រទេសជិតខាង មានភាពបត់បែនច្រើនជាង ដូចជាច្បាប់សញ្ជាតិ ដែលអនុញ្ញាតឱ្យជនជាតិបរទេសមានសិទ្ធិកាន់កាប់អចលនទ្រព្យបាន។ វាជាសញ្ញាល្អមួយ ក្នុងការផ្តល់ភាពរីកចម្រើន នៃវិស័យអចលនទ្រព្យកម្ពុជា”។

យោងតាមរបាយការណ៍ផ្លូវការចុងក្រោយបំផុតរបស់ Global Property Guide បានឱ្យដឹងថា​ ផលចំណេញពីការជួលអចលនទ្រព្យ ធៀបនឹងតម្លៃអចលនទ្រព្យ មានអត្រាខ្ពស់លំដាប់ទី៣ នៅក្នុងតំបន់អាស៊ីទាំងមូល មានចំនួន៥,៣៣ភាគរយ ដោយប្រទេសមានអត្រាខ្ពស់លំដាប់ទី១ គឺប្រទេសឥណ្ឌូណេស៊ី (៧,០៩ភាគរយ) មានអត្រាខ្ពស់លំដាប់ទី២ គឺប្រទេសហ្វីលីពិន (៦,១៣ភាគរយ)។

ប្រៀបធៀបនឹងប្រទេសជិតខាង ប្រទេសកម្ពុជាស្ថិតនៅក្នុងលំដាប់ទី១ ចំណែកប្រទេសថៃ មានផលចំណេញចំនួន៥,១៣ភាគរយ ប្រទេសវៀតណាមមានផលចំណេញចំនួន៤,៣៣ភាគរយ និងប្រទេសឡាវ មិនមានទិន្នន័យបង្ហាញពីផលចំណេញឡើយ៕

ប្រភពពី៖ Property Area

ភ្នំពេញៈ វិស័យអចលនទ្រព្យកកម្ពុជា នៅតែបន្តផ្ដល់ឱកាសដល់អ្នកវិនិយោគ ក្នុងការរកប្រាក់ចំណេញបន្ថែមទៀត បើទោះបីជាបច្ចុប្បន្ននេះ វិស័យនេះ មានការរកចម្រើននិងមានការអភិវឌ្ឍខ្លាំង ក៏ដូចជាមានអ្នកវិនិយោគច្រើនក្ដី។

លោកឈុន សម្ផស្ស នាយកប្រតិបត្តិក្រុមហ៊ុនអចលនទ្រព្យ Century 21 Premium Realty បានឱ្យដឹងនាព្រឹកថ្ងៃទី៣ ឧសភានេះថា វិស័យអចលនទ្រព្យកម្ពុជា ឃើញថាបានរីកចម្រើនជាបន្តបន្ទាប់តាំងក្នុងរយៈពេ៤០ឆ្នាំមកហើយ ហើយបច្ចុប្បន្ននេះអាចវិស័យអចលនទ្រព្យ ត្រូវបានចាត់ទុកជាប្រវត្តិសាស្ត្រមួយ ពីព្រោះយើងមិនធ្លាប់មានអគារខ្ពស់ សំណង់រីកដុះដាលបែបនេះឡើយ ។

លោកបន្តថា “នៅពេលអនាគត វិស័យនេះនឹងកាន់តែមានសន្ទុះ និងផ្ដល់ជាឱកាសដល់វិនិយោគិន ក្នុងការបណ្ដាក់ទុនវិនិយោគស្វែងរកប្រាក់ចំណេញ”។ លោកបន្តថា “បច្ចុប្បន្ននេះ កម្ពុជាមានឱកាសច្រើនក្នុងការផ្ដល់ជូនអ្នកវិនិយោគដោយសព្វថ្ងៃនេះ យើងមានការអភិវឌ្ឍហេដ្ឋារចនាសម្ព័ន្ធ យ៉ាងច្រើន ហើយរដ្ឋាភិបាលក៏បានកំណត់ប៉ូលសេដ្ឋកិច្ច សំខាន់ៗចំនួន៤សម្រាប់វិនិយោគិនក្នុងការជ្រើសរើស រួមមានខេត្តព្រះសីហនុ សៀមរាប ភ្នំពេញ និងខេត្តមណ្ឌលគីរ ”។

លោកបន្តទៀតថា ប៉ូលទាំង៤នេះ នឹងធ្វើឱ្យមានការទាក់ទាញដល់វិនិយោគិន ខណៈរដ្ឋាភិបាល ក៏បានអភិវឌ្ឍន៍ហេដ្ឋារចនាសម្ព័ន្ធ នៅក្នុងខេត្តប៉ូលសំខាន់ៗដូចជាព្រះសីហនុ សៀមរាប និងតភ្ជាប់ពីប៉ូលមួយទៅប៉ូលមួយទៀត ដើម្បីសម្រួលដល់ការតភ្ជាប់ការវិនិយោគរវាងប៉ូលនីមួយៗ។

លោកបន្ថែមថា រយៈពេលជាង៤០ឆ្នាំមកហើយ លោកមិនធ្លាប់ដែលបានឃើញការអភិវឌ្ឍវិស័យអចលនទ្រព្យ នៅក្នុងប្រទេសកម្ពុជាមានសភាពបែបនេះឡើយ ហើយលោកជឿជាក់យ៉ាងមុតមាំថា វិស័យនេះនឹងកាន់តែរីកចម្រើនបន្ថែមទៀត ស្របពេលគម្រោរបស់រដ្ឋាភិបាលជាច្រើនទៀតក៏បាន និងកំពុងរៀបចំអភិវឌ្ឍន៍ជាបណ្ដើរៗផងដែរ ដូច្នេះនៅពេលគម្រោងទាំងនោះដំណើរការ នឹងកាន់តែបង្ហាញសក្ដានុពលកាន់តែខ្លាំងបន្ថែមទៀត។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលវត្ថុកម្ពុជាបានលើកឡើងថា វិស័យអចលនទ្រព្យកម្ពុជា នឹងមានសន្ទុះឡើងវិញនៅពេលខាងមុខ បន្ទាប់ពីទទួលរងផលប៉ះពាល់ដោយ​សារតែកូវីដ១៩ ហើយនៅពាក់កណ្ដាលឆ្នាំឬចុងឆ្នាំ ២០២២នេះ សន្ទុះវិនិយោគពីបរទេសនឹងអាចងើបឡើងវិញ ។

យ៉ាងណាក្ដី ក្នុងស្ថានភាពមិនទាន់ច្បាស់លាស់បែបនេះ អ្នកជំនាញនៃវិស័យអចលនទ្រព្យកម្ពុជាមួយចំនួន បានជំរុញឱ្យវិនិយោគិនបង្កើនការប្រុងប្រយ័ត្នខ្ពស់ ហើយត្រូវសិក្សាទីផ្សារឱ្យបានច្បាស់លាស់ មុននឹងបណ្ដាក់ទុនវិនិយោគ៕

ប្រភពពី៖ Property Area