តំបន់ផ្លូវជាតិលេខ១ បានក្លាយទៅជាដែកឆក់ ស្រូបទាញបានគម្រោងវិនិយោគអចលនទ្រព្យដ៏សម្បូរបែប

តំបន់ផ្លូវជាតិលេខ១បានក្លាយទៅជា បណ្ដុំដ៏មានសក្ដានុពលមួយនៅក្រុងភ្នំពេញ ខណៈពេលដែលគេសម្លឹងឃើញថា មានគម្រោងវិនិយោគជាច្រើនកំពុងរះនៅលើទឹកដីនេះ ជាពិសេសក្នុងគេហទំព័រផ្លូវការរបស់សម្ដេចតេជោហ៊ុន សែន ក៏បានបញ្ជាក់ថា នៅតាមបណ្ដោយផ្លូវជាតិលេខ១ រាប់ចាប់ពីស្ពានព្រះមុនីវង្ស ដល់ចំណុចបឹងស្នោ កំពុងមានគម្រោងលំនៅឋានជាច្រើន បូករួមទាំងផ្សារទំនើប ដែលបានកែប្រែតំបន់នេះកាន់តែទំនើប។

មែនទែនទៅ នៅតំបន់បឹងស្នោ គឺមានគម្រោងលំនៅដ្ឋានដ៏លេខធ្លោមួយគឺប៉េង ហួត បឹងស្នោ ដែលបានស្រូបទាញមនុស្សជាច្រើនទៅទិញរស់នៅ ជាពិសេសនៅខាងមុខ ក៏មានផ្សារទំនើប PH Eco Mall ដែលរៀបនឹងលេចរូបរាងលឹមៗ នៅតាមបណ្តោយផ្លូវជាតិលេខ១។ 

ដោយឡែកបើងាកទៅកាន់តំបន់ជាយក្រុង ហួសពីបឹងស្នោបន្ដិច គឺតំបន់កៀនស្វាយ ដែលស្ថិតនៅភាគខាងត្បូងឈៀងខាងជើង បាននិងកំពុងស្ថិតក្នុងក្រសែភ្នែករបស់អ្នកវិនិយោគទាំងអស់ ហេតុផលដែលបណ្តាលឱ្យដីនៅស្រុកកៀនស្វាយ មានភាពទាក់ទាញ ក៏ព្រោះនៅតំបន់នេះ នឹងមានការអភិវឌ្ឍយ៉ាងលឿននាពេលអនាគត ដែ​លអាចនិយាយបានថា ជាតំបន់ពហុអភិវឌ្ឍ មានកំពង់ផែអន្តរជាតិ មានរោងចក្រ ជាតំបន់តភ្ជាប់ព្រុំដែនកម្ពុជា-វៀតណាម មានតំបន់កម្សាន្តកែច្នៃដ៏ធំ ជាពិសេសស្ថិតនៅជាប់ផ្លូវក្រវ៉ាត់ក្រុងទី៣ ដែលជាភាពទាក់ទាញយ៉ាងសម្រាប់សម្រាប់អ្នកអភិវឌ្ឍ។

មិនតែប៉ុណ្ណោះ តំបន់នេះកាន់តែលេចធ្លោ ដោយសារមានការអភិវឌ្ឍកោះនរា របស់អ្នកឧកញ៉ាពុង ឃាវសែ ដែលមានគម្រោងស្ពានតភ្ជាប់ទៅកោះពេជ្រផងដែរ។

ការរីកចម្រើននៅតាមនៅផ្លូវជាតិលេខ១នេះ ដោយសារតំបន់នេះមានតំបន់សេដ្ឋកិច្ចពិសេស ផ្លូវក្រវ៉ាត់ក្រុងទី៣ ដែលជាផ្លូវសេដ្ឋកិច្ចដ៏ធំ មានកំពង់ផែលំដាប់អន្តរជាតិ រួមជាមួយនឹងផ្លូវតភ្ជាប់ច្រករបៀងភាគខាងត្បូងជាដើម ហើយបច្ចុប្បន្ននេះ សម្រាប់តំបន់ច្បារអំពៅបានក្លាយជាតំបន់ពាណិជ្ជកម្មរួចទៅហើយ ដោយឡែកតំបន់ផ្សេងទៀតដែលនៅជាប់ផ្លូវជាតិលេខ១ ស្ថិតក្នុងស្រុកកៀនស្វាយ និងស្រុកលើកដែក ក៏កំពុងតែចាប់ផ្តើមមានសក្តានុពលជាបណ្ដើរ។

ប្រភព៖ Business Cambodia