អ្នកជំនាញៈ វត្តមានទេសចរជនជាតិចិន នៅកម្ពុជាជាសញ្ញាល្អ សម្រាប់ទីផ្សារខុនដូ

ភ្នំពេញៈ ទីផ្សារខុនដូ នៅក្នុងប្រទេសកម្ពុជាហាក់មានក្ដីសង្ឃឹមជាថ្មីក្រោយពីប្រទេសចិន បើកទូលាយដល់ការធ្វើដំណើរ របស់ប្រជាជនរបស់ខ្លួន ក្នុងការចេញចូលទៅក្រៅប្រទេសហើយជាពិសសនោះ គឺទេសចរជនជាតិចិនជាបន្តបន្ទាប់ចាប់ផ្ដើមចូលមកក្នុងប្រទេសកម្ពុជា។

អ្នកជំនាញនៃទីផ្សារខុនដូបានបង្ហាញពីក្ដីរំពឹងខ្ពស់ ចំពោះទីផ្សារនេះ ពីព្រោះថា វិនិយោគិននិងទេសចរចិន នឹងចេញធ្វើដំណើរទៅក្រៅប្រទេសដើម្បីស្វែងរកការវិនិយោគ ក៏ដូចជាស្នាក់នៅបណ្ដាប្រទេស ដែលជាគោលដៅរបស់ខ្លួន ក្នុងនោះដែរកម្ពុជាក៏ជាគោលដៅមួយ របស់ជនជាតិចិនផងដែរ ស្របនឹងរដ្ឋាភិបាលនៃប្រទេសទាំងពីរ ក៏មានទំនាក់ទំនងយ៉ាងស្អិតរមួតទាំងការទូតនិងពាណិជ្ជកម្ម ។

លោកស៊ុន មេសា នាយកគ្រប់គ្រងការវិនិយោគខុនដូ នៃក្រុមហ៊ុន Century 21 Mekong បានថ្លែងតាមទូរសព្ទ នៅរសៀលថ្ងៃទី៣១ មករា ២០២៣នេះឱ្យដឹងថា វត្តមានជនជាតិចិន មកកាន់ប្រទេសកម្ពុជាជាថ្មីៗនៅពេលនេះ នឹងជួយឱ្យទីផ្សារខុនដូ នៅក្នុងប្រទេសកម្ពុជាមានសកម្មភាពទិញលក់ និងវិនិយោគឡើងវិញ ហើយសន្ទុះនៃទីផ្សារនេះនឹងកាន់តែខ្លាំងស្របនឹងតម្លៃនៃខុនដូ ក្នុងប្រទេសកម្ពុជាយើងនៅមានកម្រិតទាបជាងបណ្ដាប្រទេសមួយចំនួន នៅក្នុងតំបន់អាស៊ានក៏ដូចជាប្រទេសជិតខាង ។

លោកបន្តថា “យើងបានឃើញចិនមកដល់កម្ពុជា មួយយន្តហោះដែលមានន័យជនជាតិចិនទាំងនេះ បានចាប់អារម្មណ៍កម្ពុជាហើយម៉ៅទាំងយន្តហោះមកតែម្ដង ដូច្នេះវាជាសញ្ញាកាន់តែប្រសើរ សម្រាប់ទីផ្សារមួយនេះ”។ លោកបន្តថា “យើងត្រូវចាំថាជនជាតិចិន ដែលទិញខុនដូនៅក្នុងប្រទេសកម្ពុជាកន្លងមក គឺជាទិញដើម្បីវិនិយោគដែលមានន័យថា ពួកគេមិនមែនទិញ១យូនីត សម្រាប់តែស្នាក់នៅប៉ុណ្ណោះទេ តែគេទិញច្រើនយូនីត ដើម្បីទុកជួលបន្តដល់ជនបរទេសផ្សេងទៀត ដែលមកស្នាក់នៅក្នុងប្រ​ទេសកម្ពុជាក្នុងរយៈពេលខ្លី ឬរយៈពេលវែង”។

លោកមេសាបានបន្ថែមថា វត្តមានជនជាតិចិនមកកម្ពុជា នៅពេលនេះដែរ ក៏ជាសញ្ញាវិជ្ជមាន សម្រាប់ការវិនិយោគនិងបន្តដំណើរការសាងសង់ឡើងវិញ ចំពោះអគារជាប់គាំងនៅខេត្តព្រះសីហនុផងដែរ ជាក់ស្ដែងចិនមួយយន្តហោះ ដែលមកដល់កម្ពុជាប៉ុន្មានថ្ងៃមុននេះ គឺគេបានកំណត់គោលដៅចុះចតនៅខេត្តព្រះសីហនុ។ ហេតុអ្វីគេមិនចុះចតនៅភ្នំពេញឬសៀ​មរាប។ ទាំងនេះ គឺជាការបង្ហាញយ៉ាងជាក់ច្បាស់ ចំពោះគោលបំណងរបស់ជនជាតិចិន។

ជាមួយគ្នានេះលោកខន គង្គា អគ្គនាយកក្រុមហ៊ុន ERA Cambodia ក៏បានលើកឡើងផងដែរថា កាលពីឆ្នាំ២០២២ កម្ពុជាបានរៀបចំនូវព្រឹត្តិ​ការណ៍អន្តរជាតិសំខាន់ៗមួយចំនួន ដែលព្រឹត្តិការណ៍ទាំងនេះ បានបង្ហាញឱ្យបរទេសស្គាល់ពីកម្ពុជា កាន់តែច្បាស់និងច្រើនជាងមុន ដូច្នេះហើយនៅក្នុងឆ្នាំ២០២៣ កម្ពុជានឹងទទួលបានអត្ថប្រយោជន៍ កាន់តែខ្លាំងពីព្រឹត្តិ​ការណ៍ដែលរៀបចំកន្លងមក។

លោករំពឹងថា “សន្ទុះនៃការទិញលក់ខុនដូ នៅក្នុងប្រទេសកម្ពុជាក្នុងឆ្នាំ២០២៣នេះ អាចនឹងមានកំណើនខ្លាំងជាងមុនៗ ពីព្រោះតែទីផ្សារនេះបច្ចុប្បន្ន គឺពឹងទៅលើអ្នកក្នុងស្រុកច្រើនជាងអ្នកខាងក្រៅ ហើយនៅពេលដែលមានអ្នកខាងក្រៅចូលមកបន្ថែមទៀតវានឹងធ្វើឱ្យទីផ្សារកាន់តែល្អ”៕

ប្រភពពី៖ Property Area