ដំណឹងល្អ ! អភិបាលក្រុងភ្នំពេញកំពុងរៀបចំឱ្យមានកំពង់ចម្លងពីច្បារអំពៅ មកកាន់តំបន់កោះពេជ្រ

សាលារាជធានីភ្នំពេញ បានសិក្សាដាក់ឱ្យដំណើរការបណ្តោះអាសន្នសាឡាងឆ្លងពីកោះពេជ្រ ទៅកោះនរា តភ្ជាប់ទៅកាន់ផ្លូវជាតិលេខ១ ដើម្បីជួយរំដោះការកកស្ទះចរាចរណ៍លើកំណាត់ផ្លូវជាតិលេខ១ ជាពិសេសនៅតំបន់ច្បារអំពៅ។
លោក ឃួង ស្រេង អភិបាលរាជធានីភ្នំពេញ និងមន្ដ្រីជំនាញ នៅព្រឹកថ្ងៃទី១៧ ខែកុម្ភៈ ឆ្នាំ២០២១នេះ បានចុះពិនិត្យទីតាំង ដើម្បីរៀបចំដាក់ឲ្យដំណើរការសាឡាងនេះ។

លោក ឃួង ស្រេង បានគូសបញ្ជាក់ថា ដើម្បីរំដោះបញ្ហាកកស្ទះចរាចរណ៍លើកំណាត់ផ្លូវជាតិលេខ១ រដ្ឋបាលរាជធានីភ្នំពេញនឹងរៀបចំដាក់ឲ្យមានសាឡាងឆ្លងយានយន្តជាបណ្ដោះអាសន្នចេញពីផ្លូវជាតិលេខ១ តភ្ជាប់កោះនរា ឆ្ពោះទៅកាន់កោះពេជ្រ ហើយក៏គ្រោងសាងសង់ស្ពាន១ទៀត នៅចំណុកព្រែកប្រា ឆ្ពោះទៅផ្លូវជាតិលេខ២ផងដែរ។
លោក ឃួង ស្រេង បានបញ្ជាក់ថា «ដើម្បីដោះស្រាយការកកស្ទះចរាចរណ៍នៅលើកំណាត់ផ្លូវជាតិលេខ១ សាលារាជធានីបានគិតគូរជាមួយខាងក្រុមហ៊ុន OCIC ដើម្បីខ្ចីដីកោះនរា ដាក់សាឡាង ឆ្លងទៅកោះពេជ្រ។ បន្ថែមលើនេះទៀតរដ្ឋបាលរាជធានីក៏គ្រោងនឹងសាងសង់ស្ពាន១ទៀត នៅភាគខាងត្បូង ដើម្បីរំដោះចរាចរណ៍នៅលើផ្លូវជាតិលេខ១ផង និងផ្លូវជាតិលេខ២ផង»។
គម្រោងសាងសង់ស្ពាននៅតំបន់ព្រែកប្រា គឺជាសមិទ្ធផលប្រវត្តិសាស្ត្រថ្មីមួយទៀតក្នុងទឹកដីខណ្ឌច្បារអំពៅ និងខណ្ឌមានជ័យ។ ស្ពាននេះនឹងដើរតួនាទីយ៉ាងសំខាន់ជួយសម្រួលដល់ការឆ្លងកាត់នៅតំបន់ច្បារអំពៅ ព្រមទាំងកាត់បន្ថយការកកស្ទះចរាចរណ៍ និងចំណេញពេលវេលាក្នុងការធ្វើដំណើរ៕

ប្រភពពី៖ Property News Area