អ្នកជំនាញ បង្ហាញផ្លូវសម្រាប់អ្នកចង់ទិញផ្ទះ ដោយការបង់រំលស់

ផ្ទះ ដែលជាអចលនទ្រព្យមួយដ៏ពេញនិយមបំផុត មិនថាអ្នកមានកម្រិតជីវភាពបែបណានោះទេ គឺគេតែងតែចង់បាននិងមានគោលបំណងចង់បាន ទោះបីជាទិញដោយសាច់ប្រាក់ផ្ទាល់​ឬបង់រំលស់ ក៏គេត្រូវតែព្យាយាមដែរ ដើម្បីទទួលបានផ្ទះ ដែលជាជម្រកមួយដ៏កក់ក្ដៅ ហើយអាចជាទ្រព្យប្រចាំចិត្តមិនអាចកាត់ថ្លៃបាន។

ដូច្នេះ ដើម្បីឆ្លើយតបទៅនឹងបញ្ហា និងគន្លឹះផ្សេងៗទាក់ទងនឹងការទិញផ្ទះ Business Cambodia ជួបផ្ទាល់ជាមួយលោកស្រីចន្ទី ទិវា ជាCEO Century 21 Advanced Property បានប្រាប់មកគន្លឹះមួយចំនួនក្នុងការទិញផ្ទះថា បើចង់ទិញផ្ទះមួយដែលល្អ ហើយពេញចិត្តទាំងផ្លូវកាយនិងផ្លូវចិត្តនោះ គឺត្រូវសាកសួរខ្លូនឯងសិន ថាគួរទិញផ្ទះប្រភេទណា? នៅតំបន់ណា? ដើម្បីងាយស្រួលសម្រាប់ខ្លួនឯង ក្នុងការធ្វើដំណើរនិងការរស់នៅប្រចាំថ្ងៃ។បន្ទាប់មកចាំគិតពីតម្លៃ ដោយសិក្សាឱ្យបានច្បាស់លាស់ពីទីផ្សារ ក៏ដូចជាគុណភាពផ្ទះផងដែរ។

ជុំវិញបញ្ហានេះផ្ទាល់ លោកស្រីក៏បានបញ្ជាក់ផងដែរថា ទិញផ្ទះដំបូងគឺល្អបំផុត ដោយមិនចាំបាច់ទៅជួលផ្ទះគេ នាំតែអស់លុយនោះទេ ហើយអាចទាញចំណូលពីការជួលបានទៀតផងដែរ បើចេះឆ្លាតកែច្នៃផ្ទះបានល្អ។

ចង់បង់រំលស់ផ្ទះ តើត្រូវការចំណូលប៉ុន្មាន? ចំណាយយ៉ាងម៉េចគ្មានហានិភ័យ?

ឆ្លើយតបនឹងសំណួរខាងលើ ស្រ្តីរូបនេះបានប្រាប់ថា ការបង់រំលស់ផ្ទះគឺទាមទារចំណូលមួយដែលទទួលយកបាន ពីព្រោះបើទិញផ្ទះតម្លៃជាង៥ម៉ឺនដុល្លារក៏ត្រូវការបង់ប្រហែល៥០០ដុល្លារដែរក្នុងមួយខែ ហើយបើបង់ជាមួយធនាគារទៀតសោតគឺត្រូវការ៣០%មុននៃតម្លៃផ្ទះ ដូច្នេះអាចជួយសម្រួលតម្លៃការប្រាក់បានខ្លះ។ហើយអ្នកមានគូស្រករថ្មីថ្មោងរឹតតែងាយស្រួល ពីព្រោះមានចំណូល២ប្រភពផ្សេងគ្នា អាចយឹតយោងគ្នាទៅវិញទៅមកបានងាយស្រួល។

ជុំវិញបញ្ហានេះ លោកហេង វឌ្ឍនា​ ជាប្រធានប្រតិបត្តិក្រុមហ៊ុន Century21 Golden Realty បានប្រាប់មកកាន់Business Cambodiaថា ការទិញផ្ទះគឺមានកំណើននាពេលបច្ចុប្បន្ន ហើយការបង់រំលស់ទៀតសោតគឺមានការកើនឡើងច្រើនណាស់ ពីព្រោះកម្រិតជីវភាព ក៏ដូចជាការរីកចម្រើននៃលំនៅឋានក៏ច្រើន ជាពិសេសគឺតម្រូវការគឺទាមទារជារៀងរាល់ថ្ងៃ ទើបធ្វើឱ្យគម្រោងខ្លះ លក់ចេញលឿន មានការគាំទ្រខ្លាំង។

ចំពោះ ការទិញផ្ទះ ដោយកម្ចីពីធនាគារ មានស៊ាំញាំច្រើន ក៏ប៉ុន្ដែគុណសម្បត្តិក៏មានច្រើនដែរ ដោយហេតុថាបង់រំលស់ជាមួយធនាគារមានអត្រាការប្រាក់ទាប ប្រហែលចន្លោះពី០.6%ទៅ០.៨% ពោលគឺចំណាយតិចជាងការបង់រំលស់ជាមួយម្ចាស់គម្រោងដែលមានអត្រាការប្រាក់ខ្ពស់ និងចំណាយច្រើនក្នុងការបង់រំលស់ ដែលកំណត់​ការ​ប្រាក់​ជា​មធ្យមប្រមាណ ១២% ក្នុង​១​ឆ្នាំ។

ជាងនេះទៅទៀត ដើម្បីប្រាកដថាគ្មានហានិភ័យពេលបង់រំលស់ ខាងធនាគារទាមទារចំណូលយ៉ាងហោចណាស់២ដងនៃតម្លៃបង់ប្រចាំខែ ហើយសមីខ្លួនផ្ទាល់ ក៏ត្រូវចេះបែងចែកចំណូលចំណាយឱ្យបានច្បាស់លាស់ទៅលើចំណាយប្រចាំថ្ងៃ ជាពិសេសត្រូវមានប្រាក់បម្រុងសម្រាប់ខ្លួនឯង ជាពិសេសត្រូវតែប្រាកដអាចរ៉ាប់រងបាន មិនមានបញ្ហាពេលបង់រំលស់។

ជាពិសេសត្រូវមានប្រាក់បម្រុងសម្រាប់ខ្លួនឯង អាចរ៉ាប់រងបាន មិនមានបញ្ហាពេលបង់រំលស់។ ដូច្នេះពេលសម្រេចចិត្តបង់រំលស់ជាមួយធនាគារ គេនឹងតម្រូវឱ្យអ្នកដាក់ទ្រព្យធានា លិខិតបញ្ជាក់ប្រាក់ខែ អត្តសញ្ញាណប័ណ្ណ និងអ្នកធានា ទៅតាមលក្ខខណ្ឌដែលធនាគារបានកំណត់។

ជម្រើស២ខាងលើសុទ្ធតែទាមទារសមីខ្លួនផ្ទាល់ជាអ្នកសម្រេច ដោយហេតុថាលក្ខខណ្ឌទៅតាមស្ថានភាពជាក់ស្ដែងរបស់អតិថិជន ទាំងប្រាក់ចំណូល និងជម្រើសណាំ១ដែលសាកសមនឹងទទួលយក។គួរបញ្ជាក់ផងដែរថា ដំណើរការនៃការបង់រំលស់តាមរយៈធនាគារមានភាពស្មុគស្មាញជាងការបង់រំលស់ដោយផ្ទាល់ជាមួយម្ចាស់គម្រោង។ ការបង់រំលស់ដោយផ្ទាល់ជាមួយម្ចាស់គម្រោងមិនមានភ្ជាប់លក្ខខណ្ឌតឹងរ៉ឹងដូចធនាគារនោះទេ ឲ្យតែអតិថិជនចង់ទិញ ហើយយល់ថា ខ្លួនមានលទ្ធភាពបង់រំលស់ ក៏អាចធ្វើបានភ្លាមដោយកក់ប្រាក់តិចតួច៕

ប្រភពពី៖ Business Cambodia