អ្នកជំនាញបង្ហាញទីតាំង ២ នៅភ្នំពេញដែលកំពុងមានប្រជាប្រិយខ្លាំងក្នុងការទិញផ្ទះសម្រាប់រស់នៅ

ការជ្រើសរើសទីតាំងសម្រាប់រស់នៅគឺសំខាន់ណាស់ បើយើងទិញផ្ទះចំទីតាំងល្អការរស់នៅនឹងទទួលបានទាំងសេចក្ដីសុខ និងផលចំណេញ ប៉ុន្ដែប្រសិនបើទិញចំទីតាំងដែលមិនល្អនោះការរស់នៅគឺមិនស្រួលឡើយ ហើយផលចំណេញពីផ្ទះក៏បានតិចដែរ។ ដូច្នេះហើយមុននឹងសម្រេចចិត្ដទិញផ្ទះ តម្រូវឲ្យយើងត្រូវគិតគូរឲ្យបានច្បាស់ចំពោះទីតាំង ស្របពេលបច្ចុប្បន្នការអភិវឌ្ឍលំនៅដ្ឋានគឺមានច្រើន ពិសេសនៅរាជធានីភ្នំពេញតែម្ដង។

យ៉ាងណាទាក់ទងនឹងបញ្ហានេះដែរ នាពេលថ្មីៗកន្លងទៅនេះ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអ្នកជំនាញផ្នែកអចលនទ្រព្យមួយរូបនៅកម្ពុជា បានបង្ហាញតំបន់ ២ ដែលជាទីតាំងមានសក្ដានុពល និងមានប្រជាប្រិយភាពខ្លាំងសម្រាប់ការរស់នៅបច្ចុប្បន្ន។ ដោយតំបន់ទាំងនោះរួមមាន៖ តំបន់ផ្លូវជាតិលេខ ៦A ស្ថិតនៅក្នុងខណ្ឌជ្រោយចង្វារ និងតំបន់ផ្លូវជាតិលេខ១ ស្ថិតនៅក្នុងខណ្ឌច្បារអំពៅ។

ថ្លែងប្រាប់ Business Cambodia លោក សន សៀប បានមានប្រសាសន៍ថា «តំបន់ដែលកំពុងមានប្រជាប្រិយភាពមានផ្លូវជាតិលេខ៦A នៅក្នុងខណ្ឌជ្រោយចង្វារ ហើយនិងផ្លូវជាតិលេខ១ ដែលមានបុរី ប៉េង ហួត និងបុរីផ្សេងៗទៀតហូរហែ»។

ចំពោះមូលហេតុដែលលោកលើកឡើងថា តំបន់ទាំងពីរខាងលើនេះជាទីតាំងល្អសម្រាប់ការរស់នៅ ដោយសារភូមិសាស្រ្ដនៅទីនោះគឺជាប់ទន្លេ ដីមានសំណើម ងាយស្រួលនៅក្នុងការដាំដើមឈើ ជាហេតុធ្វើឲ្យការរស់នៅមានភាពត្រជាក់ស្រួល។ មួយទៀតវាក៏មានអុកស៊ីសែនច្រើន ដែលងាយស្រួលនៅក្នុងការដកដង្ហើម និងធ្វើឲ្យខ្យល់អាកាសមានភាពស្រស់ស្រាយផងដែរ។ មួយវិញទៀតតាមការប្រមើលមើលរបស់លោក ៥ ទៅ ១០ ឆ្នាំខាងមុខ តំបន់ទាំងនេះនឹងមានការអភិវឌ្ឍកាន់តែខ្លាំងថែមទៀត។

សូមជម្រាបថា បច្ចុប្បន្នតំបន់ផ្លូវជាតិលេខ១ និងលេខ៦A កំពុងទាក់ទាញក្រុមហ៊ុនអភិវឌ្ឍន៍ជាច្រើនទៅសាងសង់លំនៅឋាននៅទីនោះ ជាក់ស្ដែងសព្វថ្ងៃនៅបណ្ដោយផ្លូវជាតិលេខ ៦A មានគម្រោងបុរីជាច្រើនដូចជា មេគង្គលែន, បុរី ជីប ម៉ុង, បុរី​ អ័​រ​គី​ដេ បុរី​ ប៉េង​ហួត បុរី The Flora និងបុរី អាម៉ូរី ជាដើម។ ហើយថ្មីៗនេះ ផ្សារទំនើប ម៉ាក្រូ ដែលជាផ្សារលក់ទំនិញដ៏ធំមួយក៏ទើបនឹងបើកដំណើរការនៅតំបន់នេះផងដែរ។

ដោយឡែកនៅបណ្ដោយផ្លូវជាតិលេខ១ វិញបច្ចុប្បន្នក៏មានការការអភិវឌ្ឍខ្លាំងខ្លាដូចគ្នា ដោយក្នុងនោះមានបុរីធំៗដូចជា បុរី ប៉េង ហួត បឹងស្នោ, បុរី ហាយ ធីច, និងបុរីជាច្រើនផ្សេងទៀត។ មួយវិញទៀតនៅតំបន់នេះក៏ជាច្រកចេញចូលដ៏សំខាន់ដែលមានមនុស្សរាប់ម៉ឺននាក់ឆ្លង់កាត់ក្នុងមួយថ្ងៃៗ។ ហើយថ្មីៗនេះ រាជរដ្ឋាភិបាលក៏បានប្រកាសសាងសង់ស្ពានធំមួយទៀតតភ្ជាប់ពីផ្លូវជាតិលេខ១ឆ្ពោះទៅតំបន់ល្វាឯម ដើម្បីភ្ជាប់ទៅនឹងគម្រោងផ្លូវល្បឿនភ្នំពេញ-បាវិតផងដែរ៕

ប្រភពពី៖ Business Cambodia